ഇടുക്കി : കട്ടപ്പന ഇരട്ടക്കൊലപാതക കേസില്‍ വിജയന്റേതെന്ന് കരുതുന്ന തലയോട്ടിയും അസ്ഥികളും കണ്ടെത്തി.വിജയനെ കൊലപ്പെടുത്താന്‍ ഉപയോഗിച്ച ചുറ്റികയും പൊലീസ് കണ്ടെടുത്തു. പാന്റ്‌സ്, ബാല്‍റ്റ് എന്നിവയും കണ്ടെടുത്തു. വിജയനെ കൊന്ന് കുഴിച്ചിട്ടു എന്ന് പ്രതി നിതീഷ് മൊഴി നല്‍കിയിരുന്നു.
കാഞ്ചിയാറിലെ വീടിന്റെ തറ കുഴിച്ച് പരിശോധിച്ചപ്പോഴാണ് വിജയന്റെ മൃതദേഹാവശിഷ്ടങ്ങള്‍ കണ്ടെത്തിയത്. മൃതദേഹാവശിഷ്ടങ്ങള്‍ വിജയന്റേത് തന്നെയെന്ന് സ്ഥിരീകരിക്കണമെങ്കില്‍ ഡി എന്‍ എ പരിശോധന നടത്തണം.
വിജയനെ കൊലപ്പെടുത്തിയത് ഭാര്യയുടെയും മകന്റെയും സഹായത്തോടെയെന്ന് നിതീഷ് സമ്മതിച്ചിരുന്നു. കേസിലെ മറ്റൊരു പ്രതി വിഷ്ണു, വിജയന്റെ മകനാണ് നിതീഷിന്റെ സുഹൃത്താണ് വിഷ്ണു . ഇയാളും മാതാവ് സുമയും കേസിലെ പ്രതികളാണ്. നവജാത ശിശുവിനെ കൊലപ്പെടുത്തിയതും നിതീഷ് തന്നെയാണ്.കൊലപാതക ശേഷം കുഞ്ഞിന്റെ മൃതദേഹം തൊഴുത്തിനുള്ളില്‍ കുഴിച്ചുമൂടുകയായിരുന്നു.
2023ലാണ് വിജയനെ കൊലപ്പെടുത്തിയത്. വിജയന്‍ പ്രായാധിക്യം മൂലം ജോലിക്ക് പോകാന്‍ കഴിയാത്ത അവസ്ഥയിലായിരുന്നു. ഈ സാഹചര്യത്തിലാണ് കൊലപാതകം.
2016ലാണ് നിതീഷിനും വിഷ്ണുവിന്റെ സഹോദരിക്കും ജനിച്ച നവജാത ശിശുവിനെ ഇവര്‍ കൊലപ്പെടുത്തിയത്.കുട്ടിയുണ്ടായതിന്റെ നാണക്കേട് മറയ്‌ക്കാനായിരുന്നു ഇത്. കൊല്ലപ്പെട്ട വിജയന്‍ കുഞ്ഞിനെ നിതീഷിന് നല്‍കിയെന്നും തുടര്‍ന്ന് നിതീഷ് കുഞ്ഞിനെ തലയണ ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയും ചെയ്തെന്നാണ് മൊഴി.കൊന്ന ശേഷം അക്കാലത്ത് താമസിച്ച വീടിന്റെ സമീപമുള്ള തൊഴുത്തില്‍ കുഴിച്ചിട്ടു.
വിജയനെ കൊലപ്പെടുത്തിയ കേസില്‍ ഭാര്യയും മകനും ഉള്‍പ്പെടെ മൂന്ന് പ്രതികളുണ്ട്.നിതീഷ്, വിജയന്റെ ഭാര്യ സുമ, മകന്‍ വിഷ്ണു എന്നിവരാണ് പ്രതികള്‍. നവജാത ശിശുവിനെ കൊന്ന കേസില്‍ നിതീഷ്, വിജയന്‍, വിഷ്ണു എന്നിവരാണ് പ്രതികള്‍.
