ന്യൂദൽഹി: പ്രധാനമന്ത്രി നരേന്ദ്ര മോദിയുടെ പേര് ഉച്ചരിക്കുന്ന ഭർത്താക്കന്മാർക്ക് അത്താഴം നൽകരുതെന്ന് സ്ത്രീകളോട് ആവശ്യപ്പെട്ട് ദൽഹി മുഖ്യമന്ത്രി അരവിന്ദ് കെജ്രിവാൾ. ദൽഹി ടൗൺ ഹാളിൽ സംഘടിപ്പിച്ച ‘മഹിളാ സമ്മാൻ സമരോഹ്’ പരിപാടിയിലാണ് കെജ്‌രിവാളിന്റെ ആഹ്വാനം. 18 വയസ്സിന് മുകളിലുള്ള എല്ലാ സ്ത്രീകൾക്കും പ്രതിമാസം 1,000 രൂപ നൽകുന്ന പദ്ധതി 2024-25 ലെ ബജറ്റിൽ പ്രഖ്യാപിച്ചതിന് പിന്നാലെയാണ് സ്ത്രീകളുമായി സംവദിക്കുന്ന പരിപാടി സംഘടിപ്പിച്ചത്.
“നിരവധി പുരുഷന്മാർ ഇന്ന് മോദിയുടെ പേര് ഉച്ചരിക്കുന്നുണ്ട്. നിങ്ങൾ വേണം അത് ശരിയാക്കണം. ഭർത്താക്കന്മാർ മോദിയുടെ നാമം ഉരുവിട്ടാൽ അത്താഴം നൽകില്ലെന്ന് നിങ്ങൾ പറയണം. അങ്ങനെയാവുമ്പോൾ ഓരോ ഭർത്താവും ഭാര്യയെ അനുസരിക്കേണ്ടിവരും.”- മഹിളാ സമ്മാൻ സമരോഹ് പരിപാടിയിൽ കെജ്രിവാൾ പറഞ്ഞു. തന്നെയും ആം ആദ്മി പാർട്ടിയെയും പിന്തുണയ്‌ക്കുമെന്ന് കുടുംബാംഗങ്ങളോട് സത്യം ചെയ്യാൻ സ്ത്രീകൾ ആവശ്യപ്പെടണമെന്നും അരവിന്ദ് കെജ്രിവാൾ പറഞ്ഞു. “നിങ്ങളുടെ സഹോദരൻ കെജ്രിവാൾ മാത്രമേ നിങ്ങളോടൊപ്പം നിൽക്കൂ” എന്ന് ബിജെപിയെ പിന്തുണയ്‌ക്കുന്ന മറ്റ് സ്ത്രീകളോട് പറയണമെന്നും അദ്ദേഹം ആവശ്യപ്പെട്ടു.
ഈ ബജറ്റിൽ സ്ത്രീ ശാക്തീകരണത്തിനായി വലിയൊരു പദ്ധതി പ്രഖ്യാപിച്ചിട്ടുണ്ടെന്ന് കെജ്രിവാൾ പറഞ്ഞു. ശാക്തീകരണത്തിന്റെ പേരിൽ തട്ടിപ്പാണ് ഇതുവരെ നടന്നിരുന്നത്. ഇപ്പോൾ ഞാൻ എല്ലാ മാസവും ഓരോ സ്ത്രീയുടെയും പേഴ്സിൽ ആയിരം രൂപ നൽകും. കാലിയായ പേഴ്സ് ശാക്തീകരണത്തിലേക്ക് നയിക്കില്ല. ഒരു കുടുംബത്തിൽ മൂന്ന് സ്ത്രീകളുണ്ടെങ്കിൽ മൂന്നുപേർക്കും ആനുകൂല്യം ലഭിക്കുമെന്നും കെജ്രിവാൾ പറഞ്ഞു.
