വാരാണസി : പ്രധാനമന്ത്രി നരേന്ദ്ര മോദി തന്റെ പാർലമെൻ്റ് മണ്ഡലമായ വാരാണസി സന്ദർശിച്ചു. ഇവിടെ എത്തിയ അദ്ദേഹം റോഡ്ഷോ നടത്തി തുടർന്ന് കാശി വിശ്വനാഥ ക്ഷേത്രത്തിൽ പ്രാർത്ഥന നടത്തി.
പ്രധാനമന്ത്രിയെ സ്വീകരിക്കാൻ മുഖ്യമന്ത്രി യോഗി ആദിത്യനാഥും മുതിർന്ന പാർട്ടി നേതാക്കളും ഭാരവാഹികളും ബാബത്പൂരിലെ ലാൽ ബഹാദൂർ ശാസ്ത്രി വിമാനത്താവളത്തിൽ എത്തിയിരുന്നു.
ബിജെപി മേഖലാ മേധാവി ദിലീപ് പട്ടേൽ പ്രധാനമന്ത്രിയുടെ സന്ദർശനത്തിനായി വാരണാസി ജില്ലയും മെട്രോപൊളിറ്റൻ യൂണിറ്റും വിപുലമായ ക്രമീകരണങ്ങൾ ഒരുക്കിയിരുന്നതായി അറിയിച്ചിരുന്നു.
മോദിയുടെ 28 കിലോമീറ്റർ റോഡ്ഷോ ആരംഭിച്ച വിമാനത്താവളത്തിന് പുറത്തുള്ള റോഡുകളിൽ ബിജെപി പ്രവർത്തകരും നാട്ടുകാരും അണിനിരന്നു. വൻ വരവേൽപ്പാണ് പ്രധാനമന്ത്രിക്ക് ഇവിടുന്ന് ലഭിച്ചത്. റോഡ്ഷോയ്ക്കിടെ സ്ത്രീകളും കുട്ടികളും ഉൾപ്പെടെയുള്ള നാട്ടുകാർ പ്രധാനമന്ത്രിക്ക് നേരെ പുഷ്പവൃഷ്ടി നടത്തി.
കഴിഞ്ഞ ദിവസം മോദി വടക്കുകിഴക്കൻ സംസ്ഥാനങ്ങൾ സന്ദർശിച്ച് ഒന്നിലധികം വികസന പദ്ധതികൾ ഉദ്ഘാടനം ചെയ്തു. തുടർന്നായിരുന്നു അദ്ദേഹത്തിന്റെ വാരാണസി സന്ദർശനം.
