ന്യൂദല്ഹി: ഉത്തര്പ്രദേശിലെ മുതിര്ന്ന കോണ്ഗ്രസ് നേതാവും മുന് വാരാണസി എംപിയുമായ രാജേഷ് കുമാര് മിശ്ര ബിജെപിയില് ചേര്ന്നു. പാര്ട്ടി ദേശീയ ആസ്ഥാനത്ത് നടന്ന ചടങ്ങില് ദേശീയ ജനറല് സെക്രട്ടറി അരുണ് സിങ്, മുന്കേന്ദ്രമന്ത്രിയും എംപിയുമായ രവിശങ്കര് പ്രസാദ്, നാഷണല് മീഡിയ ഇന്ചാര്ജ് അനില് ബലൂനി എംപി, കോ-ഇന്ചാര്ജ് സഞ്ജയ് മയൂഖ് എന്നിവര് ചേര്ന്ന് അദ്ദേഹത്തെ ബിജെപിയിലേക്ക് സ്വീകരിച്ചു.
കോണ്ഗ്രസിനൊപ്പം ആരംഭിച്ച രാഷ്ട്രീയയാത്ര ബിജെപിക്കൊപ്പം അവസാനിപ്പിക്കാന് ഉദ്ദേശിക്കുകയാണെന്ന് രാജേഷ് കുമാര് മിശ്ര പറഞ്ഞു. ഭാരതത്തിന്റെ പ്രശസ്തി ആഗോളതലത്തില് ഉയര്ത്തിയതിന് പ്രധാനമന്ത്രി നരേന്ദ്രമോദിയെ അഭിനന്ദിക്കുന്നു.
പ്രധാനമന്ത്രിയുടെ സാന്നിധ്യം വാരാണസിയുടെ ഭാഗ്യമാണ്. ലോക്സഭാ തെരഞ്ഞെടുപ്പില് വാരാണസി ഉള്പ്പെടെ രാജ്യത്തുടനീളം ബിജെപി വന് ഭൂരിപക്ഷം നേടുമെന്നും അദ്ദേഹം കൂട്ടിച്ചേര്ത്തു.
