പുതുച്ചേരി: രണ്ടു ദിവസം മുന്പ് പുതുച്ചേരിയില് കാണാതായ ഒന്പതുകാരിയുടെ മൃതദേഹം നഗരത്തിലെ ഓടയില് നിന്ന് കണ്ടെത്തി. കൈയും കാലും കെട്ടി മുണ്ടില് പൊതിഞ്ഞ നിലയിലായിരുന്നു മൃതദേഹം. വായയും മൂടിക്കെട്ടിയിരുന്നു. കുട്ടിയുടെ വീടിനടുത്തുള്ള ഓടയില് നിന്നാണ് മൃതദേഹം കണ്ടെത്തിയത്.
സംഭവത്തില് പ്രായപൂര്ത്തിയാകാത്ത രണ്ടു പേരുള്പ്പെടെ ആറുപേരെ പോലീസ് കസ്റ്റഡിയിലെടുത്തു. ഇവരെ ചോദ്യം ചെയ്യുന്നത് തുടരുകയാണെന്ന് പോലീസ് അറിയിച്ചു. ലഹരിമരുന്ന് ഉപയോഗിച്ച ശേഷം കുട്ടിയെ പീഡിപ്പിച്ച് കൊലപ്പെടുത്തിയതാകാമെന്ന് പോലീസ് പറഞ്ഞു.
പുതുച്ചേരി സോലൈ നഗറിലാണ് സംഭവം. കടുത്ത ദുര്ഗന്ധമനുഭവപ്പെട്ടതിനെ തുടര്ന്ന് സമീപവാസികള് പോലീസില് പരാതിപ്പെടുകയായിരുന്നു. പോലീസെത്തി നടത്തിയ പരിശോധനയിലാണ് ഓടയില് നിന്ന് മൃതദേഹം കണ്ടെത്തിയത്.
ശനിയാഴ്ചയാണ് അഞ്ചാംക്ലാസ് വിദ്യാര്ത്ഥിയായ ആരതിയെ കാണാതായത്. വൈകിട്ട് കളിക്കാന് പോയതായിരുന്നു ആരതി. ഏറെ വൈകിയിട്ടും മടങ്ങിയെത്താതായതോടെ മാതാപിതാക്കളും സമീപവാസികളും തെരച്ചില് നടത്തിയെങ്കിലും ഫലമുണ്ടായില്ല. പിന്നീട് രാത്രി എട്ടോടെ പോലീസില് പരാതി നല്കുകയായിരുന്നു. വിടിനടുത്തുള്ള റോഡിലൂടെ കുട്ടി കളിക്കാന് പോകുന്നതിന്റെ സിസിടിവി ദൃശ്യങ്ങള് പോലീസിന് ലഭിച്ചിരുന്നു. പോലീസ് നായകളുള്പ്പെടെ തെരച്ചില് നടത്തിയെങ്കിലും കുട്ടിയെ കണ്ടെത്താന് കഴിഞ്ഞില്ല.
പോസ്റ്റ്മോര്ട്ടത്തിനായി മൃതദേഹം ആശുപത്രിയിലേക്ക് മാറ്റി. സംഭവത്തെ തുടര്ന്ന് പ്രദേശത്തെ റോഡ് ഉപരോധിച്ച് ജനങ്ങള് പ്രതിഷേധിച്ചു.
