ധാക്ക: ബംഗ്ലാദേശിന്റെ തലസ്ഥാനമായ ധാക്കയിൽ ഏഴ് നിലകളുള്ള വാണിജ്യ കെട്ടിടത്തിൽ കഴിഞ്ഞ ദിവസം രാത്രിയിൽ ഉണ്ടായ വൻ തീപിടിത്തത്തിൽ 44 പേർ മരിക്കുകയും 22 പേർക്ക് പരിക്കേൽക്കുകയും ചെയ്തതായി ആരോഗ്യമന്ത്രി അറിയിച്ചു. തലസ്ഥാനത്തെ ബെയ്ലി റോഡ് ഏരിയയിലെ ഗ്രീൻ കോസി കോട്ടേജ് കെട്ടിടത്തിലാണ് തീപിടുത്തമുണ്ടായത്.
കെട്ടിടത്തിന്റെ ഒന്നാം നിലയിലെ കച്ചി ഭായ് എന്ന പേരിലുള്ള ഒരു ജനപ്രിയ റെസ്റ്റോറൻ്റിൽ വ്യാഴാഴ്ച രാത്രി 9:50 ഓടെയാണ് തീപിടുത്തമുണ്ടായത്. കൂടുതൽ റെസ്റ്റോറൻ്റുകളും ഒരു വസ്ത്രശാലയും ഉള്ള മുകൾ നിലകളിലേക്ക് പെട്ടെന്ന് തീ പടരുകയാണെന്ന് അഗ്നിശമനസേന ഉദ്യോഗസ്ഥർ പറഞ്ഞു.
വ്യാഴാഴ്ച രാത്രിയുണ്ടായ തീപിടിത്തത്തിൽ നിരവധി ഭക്ഷണശാലകളും കടകളും ഉണ്ടായിരുന്നു. ഇവയെല്ലാം തന്നെ അഗ്നിക്കിരയായതായി ദൃക്സാക്ഷികൾ പറഞ്ഞു. ഗുരുതരമായി പൊള്ളലേറ്റവരെ ധാക്കയിലെ വിവിധ ആശുപത്രികളിൽ പ്രവേശിപ്പിച്ചു.
