മാഡ്രിഡ്: വൈദേശിക ശക്തിയായ മുഗളന്മാര്ക്കെതിരെ പോരാടി മറാത്ത സാമ്രാജ്യം സ്ഥാപിച്ച ഛത്രപതി ശിവജി മഹാരാജാവിന്റെ ജന്മദിനത്തില് ആശംസകള് നേര്ന്ന് സ്പാനിഷ് ഫുട്ബോള് ക്ലബായ റയല് മാഡ്രിഡ്. ഫെബ്രുവരി 19ാം തീയതിയാണ് ആശംസകള് നേര്ന്നുകൊണ്ടു ഇന്സ്റ്റാഗ്രാമില് പോസ്റ്റ് ചെയ്തത്.
പോസ്റ്റിനുതാഴെ സ്നേഹം പ്രകടിപ്പിച്ചുകൊണ്ട് നിരവധി ഭാരതീയര് പ്രതികരിച്ചിട്ടുണ്ട്. പോസ്റ്റിന് ഇതിനോടകം തന്നെ രണ്ടുലക്ഷത്തിലേറെ ലൈക്കുകള് ലഭിച്ചിട്ടുണ്ട്. എന്നാല് ഈ പോസ്റ്റിനെതിരെ നിരവധി മതമൗലികവാദികള് പ്രതികരിച്ചിരിക്കുന്നതും പോസ്റ്റിനു താഴെയുള്ള കമന്റുകളില് കാണാനാകും.
ക്ലബിനെതിരെയും ഇവര് രംഗത്തെത്തിയിട്ടുണ്ട്. വൈദേശിക ശക്തികളെ ചെറുത്തു നിറുത്തിയ ചരിത്രത്തിലെ ഒരു വീര പുരുഷന് എന്ന സ്ഥാനത്തിനു പകരം ഛത്രപതി ശിവജിയെ കേവലമായ ഒരു ഹിന്ദു രാജാവായാണ് മതമൗലികവാദികള് ചിത്രീകരിക്കുന്നത്. ഇത് പ്രതികരണങ്ങളില് കാണാനും സാധിക്കും.
ഇന്ത്യയിലുള്ള എല്ലാ ആരാധകര്ക്കും ഛത്രപതി ശിവജി മഹാരാജ് ജന്മദിനാശംസകള് എന്ന് കുറിച്ചുകൊണ്ടാണ് ചിത്രം പോസ്റ്റു ചെയ്തത്. ഭാരതവുമായി ബന്ധപ്പെട്ട നിരവധി ഉത്സവങ്ങള്ക്ക് ആശംസകള് നേരുന്ന ഒരു രീതി തുടരുന്ന വിദേശ ഫുട്ബോള് ക്ലബാണ് റയല് മാഡ്രിഡ്. നിലവില് ലാ ലിഗ 2023-24 പോയിന്റ് പട്ടികയില് റയല് മാഡ്രിഡാണ് മുന്നില്. കളി സമനിലയില് അവസാനിച്ചതിനാല് റയല് മാഡ്രിഡിന് അവരുടെ അവസാന മത്സരത്തില് റയോ വല്ലക്കാനോയെ മറികടക്കാന് കഴിഞ്ഞില്ല.
