മ്യൂണിക്: യുവേഫ ചാമ്പ്യന്‍സ് ലീഗ് പോരാട്ടത്തിന്റെ ക്വാര്‍ട്ടര്‍ പോരില്‍ ഇന്നത്തെ കടുത്ത പോരാട്ടം സ്പാനിഷ് വമ്പന്‍മാരായ റയല്‍ മാഡ്രിഡും ജര്‍മന്‍ കരുത്തരായ ബയേണ്‍ മ്യൂണിക്കും തമ്മിലാണ്. ബയേണ്‍ തട്ടകം അലയന്‍സ് അരീനയില്‍ രാത്രി 12.30 മുതല്‍ മത്സരം ആരംഭിക്കും. മത്സരത്തില്‍ 2-1ന് മുന്നിലാണ് ആതിഥേയരായ ബയേണ്‍ മ്യൂണിക്ക്.
റയല്‍ സീസണില്‍ മങ്ങിയ ഫോമിലാണ്. സ്പാനിഷ് ലാലിഗയും കൈവിട്ട നിലയിലാണ്. കിങ്‌സ് കപ്പിലും സ്പാനിഷ് കപ്പിലും കിരീടം നേടാനായില്ല. ലാലിഗയില്‍ മുന്നിലുള്ള ബാഴ്‌സയെക്കാള്‍ ഒമ്പത് പോയിന്റ് പുറകിലാണ്. ലീഗില്‍ ബാക്കിയുള്ള ഏഴ് കളികളില്‍ ബാഴ്‌സ തോല്‍ക്കുന്നതിനെ കൂടി ആശ്രയിച്ചേ റയലിന്റെ കിരീട പ്രതീക്ഷകള്‍ക്ക് സ്ഥാനമുള്ളൂ. ഈ പശ്ചാത്തലത്തില്‍ ടീമിനുള്ള കച്ചിതുരുമ്പാണ് ചാമ്പ്യന്‍സ് ലീഗ്. കഴിഞ്ഞ ആഴ്‌ച്ച സ്വന്തം തട്ടകത്തിലാണ് റയല്‍ ബയേണിന് മുന്നില്‍ 2-1ന് പരാജയപ്പെട്ടത്. ഇനി സെമിയിലേക്ക് മുന്നേറാന്‍ സാധിക്കണമെങ്കില്‍ ബയേണിനെ രണ്ട് ഗോള്‍ വ്യത്യാസത്തില്‍ തോല്‍പ്പിക്കേണ്ടിവരും.
ബയേണ്‍ സീസണില്‍ മികച്ച പോരാട്ടമാണ് നടത്തിക്കൊണ്ടിരിക്കുന്നത്. ജര്‍മന്‍ കപ്പ് സെമിയിലെത്തി. ബുന്ദെസ് ലിഗയില്‍ കിരീടം ഉറപ്പിക്കാവുന്ന നിലയിലാണ് ടീമിന്റെ വിജയക്കുതിപ്പ്. സ്വന്തം തട്ടകത്തില്‍ നടക്കുന്ന ഇന്നത്തെ കളിയില്‍ ടീമിന്റെ ആത്മവിശ്വാസം ഇരട്ടിയാകേണ്ടതാണ്. സമ്മര്‍ദ്ദമില്ലാതെ കളിക്കാവുന്ന സാഹചര്യം ബയേണിനുണ്ട്.
