തിരുവനന്തപുരം : കേരള പത്രപ്രവര്‍ത്തക യൂണിയന്റെ നേതൃത്വത്തില്‍ മാധ്യമ പ്രവര്‍ത്തകര്‍ക്ക് വേണ്ടി സംഘടിപ്പിക്കുന്ന ജേര്‍ണലിസ്റ്റ് ക്രിക്കറ്റ് ലീഗിന് തിങ്കളാഴ്ച തിരുവനന്തപുരം യൂണിവേഴ്‌സിറ്റി സ്റ്റേഡിയത്തില്‍ തുടക്കമാകും. പത്രപ്രവര്‍ത്തക യൂണിയന് കീഴിലുള്ള ജില്ലാ പ്രസ് ക്ലബ്ബുകളുടെ ടീമുകള്‍ തമ്മില്‍ ഏറ്റുമുട്ടുന്ന ടൂര്‍ണമെന്റ് മന്ത്രി വി. ശിവന്‍കുട്ടി ഉദ്ഘാടനം ചെയ്യും. മന്ത്രി ജി.ആര്‍. അനില്‍ മുഖ്യാതിഥിയാകും. ആന്റണി രാജു എംഎല്‍എ, മുന്‍മന്ത്രി വി.എസ്. ശിവകുമാര്‍, ബിജെപി സംസ്ഥാന സെക്രട്ടറി എസ്. സുരേഷ് തുടങ്ങി തലസ്ഥാനത്തെ പ്രമുഖ രാഷ്‌ട്രീയ നേതാക്കള്‍ ഉദ്ഘാടനച്ചടങ്ങില്‍ പങ്കെടുക്കും.
ശുചിത്വ കേരള മിഷനുമായി സഹകരിച്ചു പൂര്‍ണമായും ഹരിത ചട്ടം പാലിച്ചാണ് ടൂര്‍ണമെന്റ് സംഘടിപ്പിക്കുന്നത്. തിങ്കളാഴ്ച രാവിലെ 8.30ന് ഇടുക്കി പ്രസ് ക്ലബ്ബും കണ്ണൂര്‍ പ്രസ് ക്ലബ്ബും തമ്മിലുള്ള മത്സരത്തോടെയാണ് ടൂര്‍ണമെന്റ് ആരംഭിക്കുക.
ടീമുകളെ നാലു ഗ്രൂപ്പുകളായി തിരിച്ച് ലീഗ് അടിസ്ഥാനത്തിലാണ് ടൂര്‍ണമെന്റ്. സെമി ഫൈനല്‍, ഫൈനല്‍ മത്സരങ്ങള്‍ 21ന് നടക്കും. തൊടുപുഴയില്‍ നടന്ന ജെസിഎല്‍ ഒന്നാം സീസണില്‍ തിരുവനന്തപുരം ജില്ലാ ടീം ചാമ്പ്യന്‍മാരായിരുന്നു.
