ന്യൂദല്ഹി: ദല്ഹി ഹൈക്കോടതിക്ക് ബോംബ് ഭീഷണിയെ തുടർന്ന് സുരക്ഷ ശക്തമാക്കി. കോടതി വളപ്പില് ബോംബ് സ്ഥാപിച്ചിട്ടുണ്ടെന്നും സ്ഫോടനം നടക്കുമെന്നും ഭീഷണി സന്ദേശത്തില് പറയുന്നു. അതേ സമയം പ്രതിയെന്ന് സംശയിക്കുന്നയാളെ കസ്റ്റഡിയിലെടുത്തു.
കോടതി രജിസ്ട്രാര് ജനറലിനാണ് ഇ-മെയില് ലഭിച്ചത്. ഫെബ്രുവരി 15 ന് ബോംബ് ഉപയോഗിച്ച് ദല്ഹി ഹൈക്കോടതി തകര്ക്കുമെന്നാണ് ഭീഷണി. ദല്ഹി കണ്ട ഏറ്റവും വലിയ സ്ഫോടനമായിരിക്കും ഇത്. കഴിയുന്നത്ര സുരക്ഷ വര്ദ്ധിപ്പിക്ക്, എല്ലാ മന്ത്രിമാരെയും വിളിക്ക്. എല്ലാവരും ഒരുമിച്ച് പൊട്ടിത്തെറിക്കുമെന്നും സന്ദേശത്തില് പറയുന്നു.
അതേ സമയം ബിഹാര് ഡിജിപിക്കും ഇതേ ഭീഷണി സന്ദേശം ലഭിച്ചിട്ടുണ്ട്. വാട്സ്ആപ്പ് സന്ദേശങ്ങളിലൂടെയും ഓഡിയോ ക്ലിപ്പുകളിലൂടെയുമാണ് ഭീഷണി. പ്രതിയെന്ന് സംശയിക്കുന്നയാളെ കര്ണാടകയില് നിന്ന് പിടികൂടി പട്നയിലെത്തിച്ചു. വിശദമായി ചോദ്യം ചെയ്തു വരികയാണെന്ന് പോലീസ്.
