നാഗര്കോവില് : മാര്ത്താണ്ഡം മേല്പ്പാലത്തില് കെഎസ്ആര്ടിസി ബസും തമിഴ്നാട് ട്രാന്സ്പോര്ട്ട് ബസും കൂട്ടിയിടിച്ച് 35 പേര്ക്ക് പരിക്കേറ്റു. നാഗര്കോവിലില് നിന്നും തിരുവനന്തപുരത്തേക്ക് വരികയായിരുന്ന കെഎസ്ആര്ടിസി ബസും കളിയിക്കാവിളയില് നിന്നും കന്യാകുമാരിയിലേക്ക് പോവുകയായിരുന്ന തമിഴ്നാട് ട്രാന്സ്പോര്ട്ട് ബസുമാണ് കൂട്ടിയിടിച്ചത്.
നാഗര്കോവിലില് നിന്നും തിരുവനന്തപുരത്തേക്ക് വരികയായിരുന്ന കെഎസ്ആര്ടിസി ബസ് മുന്നിലുള്ള ടോറസ് ലോറിയെ മറികടക്കവെ മറുഭാഗത്തുനിന്ന് വരികയായിരുന്ന തമിഴ്നാട് ബസുമായി കൂട്ടിയിടിക്കുകയായിരുന്നു.
കെഎസ്ആര്ടിസി ബസ് ഡ്രൈവര് അനീഷ് കൃഷ്ണനെ ഗുരുതര പരിക്കേറ്റ നിലയില് നാഗര്കോവില് ആശാരി പള്ളം മെഡിക്കല് കോളേജില് പ്രവേശിപ്പിച്ചു.തമിഴ്നാട്ബസ് ഡ്രൈവര് സുരേഷ് കുമാറിനെയും ഈ ആശുപത്രിയില് പ്രവേശിപ്പിച്ചിട്ടുണ്ട്. രണ്ടു ബസിലുമുണ്ടായിരുന്ന പരിക്കേറ്റ 35ഓളം പേരെ വിവിധ ആശുപത്രിയിലായി പ്രവേശിപ്പിച്ചു.
കുഴിത്തുറെ സര്ക്കാര് താലൂക്ക് ആശുപത്രിയില് 10 ഓളം പേരെയാണ് പ്രവേശിപ്പിച്ചത്. മാര്ത്താണ്ഡത്ത് സ്വകാര്യ ആശുപത്രിയില് 22 പേരെയും പ്രവേശിപ്പിച്ചിട്ടുണ്ട്.
