അയോധ്യ: പ്രാണപ്രതിഷ്ഠയ്ക്ക് ശേഷം അയോധ്യയിലേക്ക് തീര്ത്ഥാടകലക്ഷങ്ങള് ഒഴുകുകയാണ്. അവര് രാമക്ഷേത്രത്തിലേക്ക് ഭക്തര് പലവിധ സംഭാവനകളും ചൊരിയുകയാണ്. ഇതിനിടെ ഒരു സംഘം ഭക്തര് നല്കിയ വെള്ളിച്ചൂല് വാര്ത്തയില് ഇടം പിടിക്കുകയാണ്. രാമക്ഷേത്രത്തിന് 1.75 കിലോഗ്രാം ഭാരമുള്ള വെള്ളി ചൂൽ ആണ് ഭക്തര് നല്കിയത്. രാമക്ഷേത്രത്തിലെ മന്ദിരം നല്ലതുപോലെ ശുചിയാക്കണമെന്ന മോഹത്തോടെയാണ് ഭക്തർ ചൂൽ സമ്മാനിച്ചിരിക്കുന്നതെന്ന് വാര്ത്താ ഏജന്സിയായ എഎൻഐ റിപ്പോർട്ട് ചെയ്തു.
ഭക്തർ വെള്ളിച്ചൂൽ ശിരസ്സിലേറ്റി ജാഥയായി അയോധ്യ രാമക്ഷേത്രത്തിലേക്ക് പോകുന്നതിന്റെ ദൃശ്യങ്ങൾ അടങ്ങിയ വീഡിയോ വൈറല് ആയി പ്രചരിക്കുകയാണ്. എഎന്ഐ എക്സില് ഈ വീഡിയോ പങ്കുവെച്ചിട്ടുണ്ട്. നിരവധിയാളുകളാണ് ക്ഷേത്ര ട്രസ്റ്റിലേക്ക് ഇപ്പോൾ സമ്മാനങ്ങളും സംഭാവനകളും നൽകുന്നത്
.പൂർണ്ണമായും വെള്ളിയിൽ തീർത്ത ചൂൽ ആണിത്. 1.75 കിലോഗ്രാം ഭാരമുള്ള വെള്ളി ചൂൽ രാമജന്മഭൂമി തീർത്ഥ ക്ഷേത്ര ട്രസ്റ്റിന് സമ്മാനിച്ചത് അഖില ഭാരതീയ മംഗ് സമാജിലെ ഭക്തരാണ്. പ്രാണപ്രതിഷ്ഠയ്ക്ക് ശേഷം ഇതുവരെയായി ഏകദേശം 19 ലക്ഷം ഭക്തർ അയോധ്യയിലെ രാമക്ഷേത്രം സന്ദർശിച്ചു കഴിഞ്ഞു. പ്രാണപ്രതിഷ്ഠ നടന്ന ജനവരി 22ന്റെ പിറ്റേദിവസം പൊതുജനങ്ങൾക്കായി ക്ഷേത്രവാതില് തുറന്നു കൊടുത്ത ദിവസം 5 ലക്ഷത്തിലധികം എത്തിയതായാണ് കണക്ക്.
