ന്യൂദല്ഹി : ദല്ഹിയിലെ ഓള് ഇന്ത്യ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസില് (എയിംസ്) തിങ്കളാഴ്ച ഉച്ചവരെ അവധി പ്രഖ്യാപിച്ചത് റദ്ദാക്കി. അയോധ്യയിലെ രാമജന്മഭൂമി ക്ഷേത്രത്തിലെ രാമലല്ലയുടെ പ്രതിഷ്ഠാ ചടങ്ങിന്റെ ഭാഗമായി കേന്ദ്രസര്ക്കാര് സ്ഥാപനങ്ങള്ക്കെല്ലാം ഉച്ചവരെ കേന്ദ്രം അവധി പ്രഖ്യാപിച്ചിരുന്നു. അതിനോടനുബന്ധിച്ചാണ് എയിംസ് ഔട്ട് പേഷ്യന്റ് വിഭാഗത്തിനും (ഒപിഡി) അവധി പ്രഖ്യാപിച്ചത്.
ജനുവരി 22 ന് ഉച്ചവരെയാണ് അവധി പ്രഖ്യാപിച്ചിരുന്നത്. എന്നാല് രോഗികളുടെ ആവശ്യം പരിഗണിച്ച് ഉത്തരവ് പുനഃപരിശോധിക്കുകയായിരുന്നു. അന്നേദിവസം നേരത്തേ ബുക്ക് ചെയ്തിട്ടുള്ള രോഗികള്ക്ക് അസൗകര്യം ഉണ്ടാകാതിരിക്കാന് ഔട്ട്പേഷ്യന്റ് വിഭാഗം തുറന്നിരിക്കും. ഒപിഡിക്ക് പുറമെ എമര്ജന്സി സെക്ഷണല് ക്രിട്ടിക്കല് കെയര് വിഭാഗങ്ങളും തുറന്ന് പ്രവര്ത്തിക്കുമെന്ന് എയിംസ് ഔട്ട് പേഷ്യന്റ് വിഭാഗം അറിയിച്ചു. ഒപിഡി വിഭാഗത്തിന് ഉച്ചവരെ അവധി നല്കുന്നതില് പ്രതിപക്ഷം വിമര്ശിക്കുകയും ചെയ്തിരുന്നു.
