വയനാട്: കൽപ്പറ്റ എടപ്പെട്ടിയിൽ ആക്രിക്കടയിൽ നടന്ന തീപിടിത്തം ആസൂത്രിതമെന്ന് പോലീസ് കണ്ടെത്തൽ. സംഭവത്തിൽ ഒരാൾ ആക്രിക്കടയ്ക്ക് തീവയ്‌ക്കുന്നതിന്റെ സിസിടിവി ദൃശ്യങ്ങൾ പുറത്ത് വന്നു. ചൊവ്വാഴ്ച രാത്രി ഒമ്പതരയോടെയായിരുന്നു സംഭവം. ആളപായം സംഭവിച്ചില്ലെങ്കിൽ കൂടി കട പൂർണമായും കത്തി നശിച്ചു.
കൽപ്പറ്റയിൽ നിന്നും അഗ്നിരക്ഷാ സേനയെത്തിയാണ് തീ നിയന്ത്രണവിധേയമാക്കിയത്. സംഭവത്തിൽ കൽപ്പറ്റ പോലീസ് അന്വേഷണം ആരംഭിച്ചു. ആക്രിക്കടയ്ക്ക് കരുതിക്കൂട്ടി ഒരാൾ തീ വയ്‌ക്കുന്നതിന്റെ ദൃശ്യങ്ങളാണ് പുറത്ത് വന്നിരിക്കുന്നത്.
ആക്രിക്കടയ്ക്ക് സമീപത്തെ സിസിടിവി ക്യാമറയിൽ ഒരാൾ നടന്നു വന്ന് തീ വയ്‌ക്കുന്നതിന്റെ ദൃശ്യങ്ങളാണ് പ്രചരിക്കുന്നത്. തീയിട്ടതിന് ശേഷം ഇയാൾ ഓടിപ്പോകുന്നതും ദൃശ്യങ്ങളിൽ വ്യക്തമാണ്.
