ഗാന്ധിനഗര്‍: ബഹിരാകാശത്ത് നിന്ന് പോലും കാണാന്‍ കഴിയുന്ന ഒരു ഗ്രീന്‍ എനര്‍ജി പാര്‍ക്ക് നിര്‍മ്മിക്കുന്നതിനായി ഗുജറാത്തില്‍ രണ്ടു ലക്ഷം കോടി രൂപയിലധികം നിക്ഷേപിക്കുമെന്ന് ഗൗതം അദാനി. ഗാന്ധിനഗറില്‍ നടന്ന വൈബ്രന്റ് ഗുജറാത്ത് ഗ്ലോബല്‍ സമ്മിറ്റിന്റെ 10ാം പതിപ്പിനെ അഭിസംബോധന ചെയ്തുകൊണ്ട് അദാനി ഗ്രൂപ്പ് തലവന്‍ നിക്ഷേപം ഒരു ലക്ഷം തൊഴിലവസരങ്ങള്‍ സൃഷ്ടിക്കുമെന്നും പറഞ്ഞു.
കഴിഞ്ഞ ഉച്ചകോടിയില്‍ വാഗ്ദാനം ചെയ്ത 55,000 കോടി രൂപയില്‍ അദാനി ഗ്രൂപ്പ് ഇതിനകം തന്നെ 50,000 കോടിയും ചെലവഴിച്ചു. ആപ്പിള്‍ ടു എയര്‍പോര്‍ട്ട് ഗ്രൂപ്പ് ഇപ്പോള്‍ കച്ചില്‍ 30 ജിഗാവാട്ട് ശേഷിയുള്ള 25 ചതുരശ്ര കിലോമീറ്ററില്‍ ഒരു ഗ്രീന്‍ എനര്‍ജി പാര്‍ക്ക് നിര്‍മ്മിക്കുകയാണെന്ന് അദാനി പറഞ്ഞു.
2014 മുതല്‍, ജിഡിപിയില്‍ 185 ശതമാനം വളര്‍ച്ചയും പ്രതിശീര്‍ഷ വരുമാനത്തില്‍ 165 ശതമാനം വളര്‍ച്ചയും ഇന്ത്യ കൈവരിച്ചു, ഇത് ജിയോപൊളിറ്റിക്കല്‍, പാന്‍ഡെമിക് സംബന്ധമായ വെല്ലുവിളികള്‍ കണക്കിലെടുക്കുമ്പോള്‍ സമാനതകളില്ലാത്തതാണെന്ന് പ്രധാനമന്ത്രി നരേന്ദ്ര മോദിയുടെ സാന്നിധ്യത്തില്‍ നടന്ന ഉച്ചകോടിയില്‍ അദാനി പറഞ്ഞു.
റിലയന്‍സ് ഇന്‍ഡസ്ട്രീസിലെ മുകേഷ് അംബാനി ഉള്‍പ്പെടെയുള്ള മറ്റ് വ്യവസായികളും നിക്ഷേപങ്ങള്‍ പ്രഖ്യാപിച്ചിട്ടുണ്ട്. ഗുജറാത്തില്‍ കാര്‍ബണ്‍ ഫൈബര്‍ സൗകര്യം സ്ഥാപിക്കാനാണ് റിലയന്‍സ് ലക്ഷ്യം വയ്‌ക്കുന്നത്. തന്റെ കമ്പനിയായ റിലയന്‍സ് ഇന്‍ഡസ്ട്രീസ് ഇന്ത്യയിലെ ആദ്യത്തെയും ലോകോത്തരവുമായ കാര്‍ബണ്‍ ഫൈബര്‍ സൗകര്യം ഹാസിറയില്‍ സ്ഥാപിക്കുമെന്ന് ചടങ്ങില്‍ സംസാരിച്ച മുകേഷ് അംബാനി പറഞ്ഞു. റിലയന്‍സ് അന്നും ഇന്നും എന്നും ഒരു ഗുജറാത്തി കമ്പനിയായി തുടരുമെന്നും അംബാനി കൂട്ടിച്ചേര്‍ത്തു.
കഴിഞ്ഞ 10 വര്‍ഷത്തിനുള്ളില്‍ ഇന്ത്യയിലുടനീളം ലോകോത്തര ആസ്തികളും ശേഷികളും സൃഷ്ടിക്കുന്നതിനായി റിലയന്‍സ് 150 ബില്യണ്‍ ഡോളറിലധികം (12 ലക്ഷം കോടി) നിക്ഷേപിച്ചു. ഇതില്‍ മൂന്നിലൊന്ന് നിക്ഷേപം ഗുജറാത്തില്‍ മാത്രമാണ്. ഹരിത വളര്‍ച്ചയില്‍ ഗുജറാത്തിനെ ആഗോള തലത്തില്‍ എത്തിക്കുന്നതിന് കമ്പനി സംഭാവന നല്‍കും. 2030ഓടെ പുനരുപയോഗിക്കാവുന്ന ഊര്‍ജ്ജത്തിലൂടെ ഗുജറാത്തിന്റെ ലക്ഷ്യത്തിന്റെ പകുതിയും നിറവേറ്റാന്‍ ഞങ്ങള്‍ സഹായിക്കുമെന്ന് റിലയന്‍സ് മേധാവി പറഞ്ഞു.
ജാംനഗറില്‍ 5,000 ഏക്കറില്‍ ധീരുഭായ് അംബാനി ഗ്രീന്‍ എനര്‍ജി ഗിഗാ കോംപ്ലക്‌സ് നിര്‍മ്മിക്കാന്‍ റിലയന്‍സ് ആരംഭിച്ചതായി അംബാനി പറഞ്ഞു. ഇത് വന്‍തോതില്‍ ഹരിത തൊഴിലവസരങ്ങള്‍ സൃഷ്ടിക്കുകയും ഹരിത ഉല്‍പന്നങ്ങളുടെയും വസ്തുക്കളുടെയും ഉല്‍പ്പാദനം പ്രാപ്തമാക്കുകയും സംസ്ഥാനത്തെ അത്തരം ചരക്കുകളുടെ മുന്‍നിര കയറ്റുമതിക്കാരാക്കുകയും ചെയ്യും, 2024 രണ്ടാം പകുതിയില്‍ തന്നെ ഇത് പുറത്തിറക്കാന്‍ കമ്പനി തയ്യാറാണെന്നും അദ്ദേഹം പറഞ്ഞു.
