അയോധ്യ : കേന്ദ്രത്തില് നരേന്ദ്രമോദി സര്ക്കാരും സംസ്ഥാനത്ത് യോഗി ആദിത്യനാഥ് സര്ക്കാരും ഭരണത്തിലെത്തിയതോടെ ഉത്തര്പ്രദേശില് വികസന കുതിപ്പാണ് നടക്കുന്നത്. അടിസ്ഥാന സൗകര്യങ്ങളിലും വികസന സംരംഭങ്ങളിലും ശതകോടികളാണ് കേന്ദ്രവും സംസ്ഥാനവും ചേര്ന്ന് മുടക്കുന്നത്.
ഇന്ന് അയോധ്യയില് പുനര് വികസിപ്പിച്ച റെയില് വേ സ്റ്റേഷനും വിമാനത്തവളവും പ്രധാനമന്ത്രി ഉദ്ഘാടനം ചെയ്തു. ഇങ്ങനെ വികസന പ്രവര്ത്തനം പുരോഗമിക്കുമ്പോള് അയോധ്യയിലെ ഭൂമി വിലയും കുതിക്കുകയാണ്. ജനുവരി 22ന് അയോധ്യയില് ശ്രീരാമക്ഷേത്രം കൂടി പ്രധാനമന്ത്രി ഭക്തര്ക്കായി തുറന്നു നല്കുമ്പോള് ഭൂമി വില ഇനിയും കുതിക്കുമെന്നാണ് കരുതുന്നത്.
അയോധ്യയില് ക്ഷേത്രം നിര്മ്മിക്കുന്നതിനുളള 2019ലെ ചരിത്ര വിധിക്ക് ശേഷം തന്നെ ഭൂമിവില ഉയരാന് തുടങ്ങിയിരുന്നു.റിയല് എസ്റ്റേറ്റ് മേഖലയും തഴയ്ക്കാന് തുടങ്ങി.
അടുത്തിടെ നടത്തിയ പഠന പ്രകാരം ശ്രീരാമക്ഷേത്രത്തിന് ചുറ്റും മാത്രമല്ല അയോധ്യയുടെ പ്രാന്തപ്രദേശങ്ങളിലും ഭൂമിയുടെ വിലയില് ഗണ്യമായ വര്ധനവാണ് ഉണ്ടായിട്ടുളളത്. ഫൈസാബാദ് റോഡില് ഭൂമിവില 2019-ല് ചതുരശ്ര അടിക്ക് 400-700 രൂപ എന്ന നിരക്കില് നിന്ന് 2023 ഒക്ടോബര് എത്തിയപ്പോള് ചതുരശ്ര അടിക്ക് 1,500-3,000 ആയി ഉയര്ന്നു. നഗര പരിധിക്കുള്ളില് ഭൂമിയുടെ ശരാശരി വില 2019-ല് ചതുരശ്ര അടിക്ക് 1,000-2,000 രൂപയില് നിന്ന് ഇപ്പോള് ഒരു ചതുരശ്ര അടിക്ക് 4,000-6,000 രൂപയായി ഉയര്ന്നു.
നിക്ഷേപ അവസരമായും പുതിയ സാഹചര്യത്തെ കാണുന്നവരുണ്ട്. അയോധ്യയുടെ ചരിത്രപരവും സാംസ്കാര്യവുമായ പാരമ്പര്യം വലിയ ബിസിനസ് അവസരമായി കാണുകയാണ് റിയല് എസ്റ്റേറ്റ് മേഖലയിലെ കമ്പനികളും.
വലിയ ഡെവലപ്പര്മാരും ഹോട്ടല് ശൃംഖലകളുമാണ് ഇപ്പോള് പണം മുടക്കുന്നത്. ജനുവരിയില് അയോധ്യ ജില്ലയില് 25 ഏക്കര്, പാര്പ്പിട വികസന പദ്ധതി ആരംഭിക്കാന് അഭിനന്ദന് ലോധ ഹൗസ് പദ്ധതിയിട്ടിട്ടുണ്ട്. ശ്രീരാമക്ഷേത്രത്തില് നിന്ന് 15 മിനിറ്റ് മാത്രം അകലെയാണ് ഈ പദ്ധതി.
താജ്, റാഡിസണ് തുടങ്ങിയ വലിയ ഹോട്ടല് ശൃംഖലകളും പ്രദേശത്ത് കെട്ടിടങ്ങള് നിര്മ്മിക്കാന് പദ്ധതിയിടുന്നു.
വരും മാസങ്ങളില് ആഭ്യന്തര, അന്തര്ദേശീയ വിനോദസഞ്ചാരികളുടെ വരവ് കൂടുമെന്നത് കണക്കിലെടുത്താണ് ഇതെല്ലാം.
