ന്യൂദല്ഹി: സെന്ട്രല് ഇന്ഡസ്ട്രിയല് സെക്യൂരിറ്റി ഫോഴ്സിന് (സിഐഎസ്എഫ്) ആദ്യ വനിതാ മേധാവി. ദല്ഹി മെട്രോയ്ക്കും രാജ്യത്തുടനീളമുള്ള വിമാനത്താവളങ്ങള്ക്കും സുരക്ഷയൊരുക്കുന്ന സിഐഎസ്എഫിന്റെ പുതിയ മേധാവിയായി നീന സിങ് നിയമിതയായി. രാജസ്ഥാന് കേഡറിലെ 1989 ബാച്ച് ഐപിഎസ് ഓഫീസറായ നീന സിങ് കേന്ദ്രസേനയില് ഡയറക്ടര് ജനറലാവുന്ന ആദ്യ വനിതയാണ്.
സിഐഎസ്എഫിന്റെ സ്പെഷല് ഡിജിയായി സേവനമനുഷ്ഠിച്ചു വരികയായിരുന്നു. അടുത്ത വര്ഷം ജൂലൈ 31ന് വിരമിക്കുന്നതുവരെ സിഐഎസ്എഫ് മേധാവിയായി തുടരും. ബിഹാര് സ്വദേശിനിയായ നീന സിങ്ങിന്റെ പഠനം പട്ന വിമന്സ് കോളജിലും ജവഹര്ലാല് നെഹ്റു യൂണിവേഴ്സിറ്റിയിലുമായിരുന്നു. ഹാര്വാര്ഡ് യൂണിവേഴ്സിറ്റിയില് നിന്ന് പബ്ലിക് അഡ്മിനിസ്ട്രേഷനില് ബിരുദാനന്തര ബിരുദവും നേടിയിട്ടുണ്ട്.
2000ല് സംസ്ഥാന വനിതാ കമ്മിഷനിലെ മെമ്പര് സെക്രട്ടറിയായിരിക്കെ ദുരിതമനുഭവിക്കുന്ന സ്ത്രീകള്ക്കായി ഹിയറിങ്ങുകള് നടത്താന് കമ്മിഷന് അംഗങ്ങള് ജില്ലകളിലേക്ക് പോകുന്നതിന് ഔട്ട്റീച്ച് പ്രോഗ്രാം നടപ്പിലാക്കി. നോബല് സമ്മാന ജേതാക്കളായ അഭിജിത് ബാനര്ജി, എസ്തര് ഡഫ്ളോ എന്നിവരോടൊപ്പം രണ്ട് ഗവേഷണ പ്രബന്ധങ്ങള് രചിച്ചിട്ടുണ്ട്. 2005-2006 കാലഘട്ടത്തില് മസാച്ചുസെറ്റ്സ് ഇന്സ്റ്റിറ്റിയൂട്ട് ഓഫ് ടെക്നോളജിക്ക് വേണ്ടി പോലീസ് സ്റ്റേഷനുകള് സൗഹൃദപരമാക്കുന്നതിനുള്ള പ്രോജക്റ്റിലും പ്രവര്ത്തിച്ചു.
2013-2018 കാലത്ത് സിബിഐ ജോയിന്റ് ഡയറക്ടറായിരിക്കെ ഷീന ബോറ വധക്കേസ്, ജിയാ ഖാന് ആത്മഹത്യ തുടങ്ങിയ കേസുകളുടെ മേല്നോട്ടം വഹിച്ചു. 2020 ല്, പ്രൊഫഷണല് മികവിനുള്ള അതി ഉത്കൃഷ്ട് സേവാ മെഡല് ലഭിച്ചിട്ടുണ്ട്. പുതിയ നിയമനങ്ങളുടെ ഭാഗമായി ഇന്ഡോ-ടിബറ്റന് ബോര്ഡര് പോലീസ് (ഐടിബിപി) തലവനായിരുന്ന അനീഷ് ദയാല് സിങ്ങിനെ സെന്ട്രല് റിസര്വ് പോലീസ് ഫോഴ്സിന്റെ (സിആര്പിഎഫ്) ഡയറക്ടര് ജനറലായി നിയമിച്ചു.
