ന്യൂദൽഹി: ഓപ്പറേഷൻ സിന്ദൂരിൽ അസാധാരണമായ ധൈര്യം പ്രകടിപ്പിക്കുകയും 250-ലധികം പേരുടെ ജീവൻ രക്ഷിക്കുകയും ചെയ്തതിന് 19 സിഐഎസ്എഫ് ഉദ്യോഗസ്ഥർക്ക് സിഐഎസ്എഫ് ഡിജി പ്രവീർ രഞ്ജൻ , മെഡൽ നൽകി ആദരിച്ചു. ഈ വർഷം മെയ് മാസത്തിൽ അതിർത്തി കടന്നുള്ള ആക്രമണത്തിലെ നിർണായക ഘട്ടത്തിൽ ജമ്മു കശ്മീരിലെ ഉറി ജലവൈദ്യുത പദ്ധതികൾ (യുഎച്ച്ഇപി-ഐ & II) സംരക്ഷിക്കുന്നതിൽ സൈനികർ വഹിച്ച നിർണായക പങ്കിനെ അംഗീകരിക്കുന്ന തരത്തിലാണ് ചൊവ്വാഴ്ച സിഐഎസ്എഫ് ആസ്ഥാനത്ത് ചടങ്ങ് സംഘടിപ്പിച്ചത്.
ശത്രുക്കളുടെ കനത്ത വെടിവയ്‌പിനിടെ സിഐഎസ്എഫ് ഉദ്യോഗസ്ഥർ വലിയ ധൈര്യവും ക്ഷമയും പ്രൊഫഷണലിസവും പ്രകടിപ്പിച്ചതായി ഉദ്യോഗസ്ഥർ പറഞ്ഞു. കമാൻഡന്റ് രവി യാദവിന്റെ നേതൃത്വത്തിൽ ഡെപ്യൂട്ടി കമാൻഡന്റ് മനോഹർ സിംഗ്, അസിസ്റ്റന്റ് കമാൻഡന്റ് സുഭാഷ് കുമാർ എന്നിവരുടെ സഹായത്തോടെ, 19 ഉദ്യോഗസ്ഥർ ചുറ്റുമുള്ള ജനവാസ കേന്ദ്രങ്ങൾ സംരക്ഷിക്കാൻ ഉടനടി നടപടിയെടുക്കുകയും രക്ഷാപ്രവർത്തനങ്ങൾ ആരംഭിക്കുകയും ചെയ്തു. പാകിസ്ഥാൻ ഷെല്ലാക്രമണ റൂട്ടുകളുടെ തത്സമയ വിശകലനം ഉപയോഗിച്ച് താമസക്കാരെ സുരക്ഷിത മേഖലകളായി തിരിച്ചറിഞ്ഞ് ബങ്കറുകളിലേക്ക് മാറ്റിയെന്നും ഉന്നത ഉദ്യോഗസ്ഥർ വ്യക്തമാക്കി.
കൂടാതെ പാകിസ്ഥാനിൽ നിന്നുള്ള കനത്ത ഷെല്ലാക്രമണം ഉറി ജലവൈദ്യുത പദ്ധതികൾക്കും, സുപ്രധാന അടിസ്ഥാന സൗകര്യങ്ങൾക്കും, ചുറ്റുമുള്ള ജനങ്ങൾക്കും ഗുരുതരമായ ഭീഷണി ഉയർത്തി. തുടർച്ചയായ ഷെല്ലാക്രമണത്തിനിടയിൽ ജനവാസ മേഖലകൾക്ക് സമീപം ഷെല്ലുകൾ പതിക്കാൻ തുടങ്ങിയപ്പോൾ സിഐഎസ്എഫ് ഉദ്യോഗസ്ഥർ വീടുതോറും പോയി സാധാരണക്കാരെയും സ്ത്രീകളെയും കുട്ടികളെയും പ്രായമായവരെയും എൻഎച്ച്പിസി ജീവനക്കാരെയും അവരുടെ കുടുംബങ്ങളെയും ഒഴിപ്പിച്ചു. ഇത് ഏകദേശം 250 സാധാരണക്കാരെ സുരക്ഷിതമായി ഒഴിപ്പിക്കാൻ സഹായിച്ചു, അല്ലാത്തപക്ഷം ഗണ്യമായ ജീവനും സ്വത്തിനും നഷ്ടം സംഭവിക്കുമായിരുന്നുവെന്നും മുതിർന്ന സേന ഉദ്യോഗസ്ഥർ കൂട്ടിച്ചേർത്തു.
