ന്യൂദല്ഹി: കേരളത്തില് കൊവിഡ് 19 ന്റെ ഉപവകഭേദം ജെഎന് 1 കണ്ടെത്തി. പതിവു നിരീക്ഷണത്തിന്റെ ഭാഗമായാണ് ഈ കണ്ടെത്തലെന്ന് ഐസിഎംആര് ഡയറക്ടര് ജനറല് ഡോ. രാജീവ് ബഹല് അറിയിച്ചു. കൊവിഡ്-19 ന്റെ പശ്ചാത്തലത്തില് പുതുക്കിയ നിരീക്ഷണ മാര്ഗനിര്ദേശങ്ങള് അനുസരിച്ച്, രോഗബാധിതരുടെ സാമ്പിളുകള് മുഴുവന് ജനിതക ശ്രേണീകരണത്തിനായി അയക്കുന്നുണ്ട്.
ഇത്തരത്തില് 2023 ഡിസംബര് എട്ടിനു തിരുവനന്തപുരത്തെ കരകുളത്തു നിന്നുള്ള ആര്ടിപിസിആര് പോസിറ്റീവ് സാമ്പിളിലാണ് ഈ കേസ് കണ്ടെത്തിയത്. കഴിഞ്ഞ നവംബര് 18 നാണ് സാമ്പിള് പരിശോധനയില് കൊവിഡ് പോസിറ്റീവ് ആണെന്നു കണ്ടെത്തിയത്. രോഗിക്ക് ഇന്ഫഌവന്സ ലൈക്ക് ഇല്നെസി (ഐഎല്ഐ) ന്റെ നേരിയ ലക്ഷണങ്ങള് ഉണ്ടായിരുന്നു. അതിനുശേഷം കൊവിഡ്19 ല് നിന്നു മുക്തി നേടി.
കഴിഞ്ഞ ഏതാനും ആഴ്ചകളായി കേരളത്തില് രോഗബാധിതരുടെ എണ്ണം വര്ധിക്കുകയാണ്. ഐഎല്ഐ കേസുകളില് നിന്നുള്ള സാമ്പിളുകള് പരിശോധനക്കായി നിര്ദ്ദേശിക്കുന്നതിലെ വര്ധനയാണ് ഇതിനു കാരണം. ഈ കേസുകളില് ഭൂരിഭാഗവും ചികിത്സാപരമായി നേരിയതും പ്രത്യേക ചികിത്സ കൂടാതെ സ്വന്തം വീടുകളില് തന്നെ സുഖം പ്രാപിക്കുന്നതുമാണ്.
കേന്ദ്ര ആരോഗ്യ മന്ത്രാലയത്തിന്റെ നിര്ദേശപ്രകാരം സംസ്ഥാനങ്ങളിലെ എല്ലാ ആരോഗ്യ കേന്ദ്രങ്ങളിലും പൊതുജനാരോഗ്യ- ആശുപത്രികളിലും തയ്യാറെടുപ്പ് നടപടികള് വിലയിരുത്തുന്നതിനായി മോക്ക് ഡ്രില് ആരംഭിച്ചിട്ടുണ്ട്. ജില്ലാ കളക്ടര്മാരുടെ മേല്നോട്ടത്തിലാണ് മോക്ക് ഡ്രില് നടക്കുന്നത്. കേന്ദ്ര ആരോഗ്യമന്ത്രാലയം കേരള സംസ്ഥാന ആരോഗ്യവകുപ്പുമായി നിരന്തരം ബന്ധപ്പെടുകയും വിവിധ പരിശോധന കേന്ദ്രങ്ങള് നിരീക്ഷിക്കുകയും ചെയ്യുന്നുണ്ടെന്നും മന്ത്രാലയം വാര്ത്താ കുറിപ്പില് അറിയിച്ചു.
