ന്യൂദല്‍ഹി: ലളിത ജാ ആണ് പാര്‍ലമെന്‍റ് ആക്രമണത്തിന്റെ പിന്നിലെ മുഖ്യസൂത്രധാരന്‍ എന്ന് പൊലീസ്. സാഗറും മനോരഞ്ജനും പാര്‍ലമെന്‍റിനകത്തും അമോലും നീലം ദേവിയും പാര്‍ലമെന്‍റിന് പുറത്തും പ്രശ്നങ്ങള്‍ സൃഷ്ടിക്കുമ്പോള്‍ ഇതിന് പിന്നില്‍ പ്രവര്‍ത്തിച്ച ലളിത ജാ ഇവരുടെ മൊബൈല്‍ ഫോണുകളുമായി ഒളിവില്‍പ്പോവുകയായിരുന്നു. എല്ലാവരുടെയും മൊബൈല്‍ ഫോണുകള്‍ നശിപ്പിക്കാനാണ് ഒളിവില്‍ പോയതെന്ന് ലളിത് ജാ പറഞ്ഞു. എല്ലാവരുടെയും ഫോണുകള്‍ നശിപ്പിച്ചതിനാല്‍ പാര്‍ലമെന്‍റ് ആക്രമണത്തില്‍ പങ്കെടുത്തുവര്‍ ആരെയൊക്കെ വിളിച്ചു എന്ന് അറിയാന്‍ പൊലീസിന് കഴിയില്ല.
മൊബൈല്‍ഫോണുകള്‍ നശിപ്പിച്ച ശേഷം ലളിത് ജാ പിടികൊടുക്കുകയായിരുന്നു. പക്ഷെ ചോദ്യം ചെയ്യലില്‍ ഇയാള്‍ മൊഴികള്‍ മാറ്റിപ്പറയുകയാണെന്നും പൊലീസ് പറയുന്നു.
ലളിത് ജാ കൊല്‍ക്കൊത്തയിലാണ് കഴിഞ്ഞിരുന്നത്. ഇയാളാണ് പാര്‍ലമെന്‍റ് ആക്രമണം ആസൂത്രണം ചെയ്തതെന്നും പറയുന്നു. ആക്രമണത്തില്‍ പങ്കെടുത്തവര്‍ക്ക് ക്ലാസ് നല്‍കിയതും ഇയാളാണ്. കൊല്‍ക്കൊത്തയില്‍ താമസിക്കുമ്പോള്‍ കുട്ടികള്‍ക്ക് ട്യൂഷന്‍ നല്‍കുന്നതിനാല്‍ മാസ്റ്റര്‍ജി എന്നാണ് ആ പ്രദേശത്ത് വിളിക്കപ്പെട്ടിരുന്നത്.
പ്രതികള്‍ പ്രത്യേകം നിര്‍മ്മിച്ച ഷൂസിനുള്ളിലാണ് പുക സ്പേ ചെയ്യാനുള്ള കാനിസ്റ്റര്‍ ഒളിപ്പിച്ച് വെച്ചത്. കട്ടിയുള്ള റബ്ബര്‍ സോളുള്ള ചെരിപ്പില്‍ കൃത്യമായ അളവില്‍ മുറിച്ച് കുഴിയുണ്ടാക്കിയ ശേഷം അതിനുള്ളില്‍ ആണ് സ്പ്രേയര്‍ ഒളിപ്പിച്ചുവെച്ചത്. ഇത് പാര്‍ലമെന്‍റിലെ സുരക്ഷാപരിശോധകര്‍ക്ക് കണ്ടെത്താനായില്ല. ഈ കളര്‍ പുക സ്പ്രേ ചെയ്യാവുന്ന കാനിസ്റ്ററുകള്‍ ചൈനയില്‍ നിര്‍മ്മിച്ചവയാണ്.
