കോഴിക്കോട് : ഓര്‍ക്കാട്ടേരിയിലെ ഭര്‍തൃഗൃഹത്തില്‍ വീട്ടമ്മ ഷബ്ന ആത്മഹത്യ ചെയ്തതില്‍ മകളുടെ നിര്‍ണായക വെളിപ്പെടുത്തല്‍.മാതാവിനെ പിതാവിന്റെ ബന്ധുക്കള്‍ മര്‍ദ്ദിക്കാറുണ്ടായിരുന്നുവെന്ന് മകള്‍ പറഞ്ഞു.
പിതാവിന്റെ അമ്മാവന്‍ ഹനീഫ അമ്മയെ അസഭ്യം പറഞ്ഞു മര്‍ദ്ദിച്ചു. മാതാവിനെ രക്ഷിക്കണമെന്ന് പലതവണ ആവശ്യപ്പെട്ടെങ്കിലും ആരും തയാറായില്ല. മാതാവിന് മാനസികരോഗം ഉണ്ടെന്ന് സ്ഥാപിക്കാനാണ് നീക്കം നടന്നെന്നും മകള്‍ പറഞ്ഞു.
തിങ്കളാഴ്ചയാണ് ഷബ്ന ആത്മഹത്യ ചെയ്തത്.സംഭവത്തില്‍ ഭര്‍ത്താവിന്റെ അമ്മാവന്‍ ഹനീഫയെ കസ്റ്റഡിയിലെടുത്തിട്ടുണ്ട്. ഇയാള്‍ ഷബ്‌നയെ മര്‍ദ്ദിക്കുന്നതിന്റെ ദൃശ്യങ്ങള്‍ പൊലീസിന് ലഭിച്ചിട്ടുണ്ട്. ഷബ്‌നയുടെ മരണത്തിന് കാരണം ഭര്‍ത്താവിന്റെ മാതാവും ബന്ധുക്കളും ആണ് എന്ന് നേരത്തെ കുടുംബം ആരോപിച്ചിരുന്നു.
ഭര്‍ത്താവ് വിദേശത്തു നിന്ന് എത്തുന്നതിന്റെ തലേ ദിവസമാണ് അമ്മയ്‌ക്കൊപ്പം ഷബ്ന ഭര്‍തൃവീട്ടിലെത്തിയത്. മാതാവ് തിരിച്ചു പോയ ശേഷം ഭര്‍തൃവീട്ടുകാര്‍ മാനസികമായും ശാരീരികമായും പീഡിപ്പിച്ചെന്ന് ഷബ്ന സ്വന്തം വീട്ടില്‍ അറിയിച്ചിരുന്നു. മരണം ഉറപ്പാക്കിയ ശേഷമായിരുന്നു ഷബ്‌നയുടെ വീട്ടുകാരെ വിവരം അറിയിച്ചതെന്നും ആരോപണവുമുണ്ട്.
