കണ്ണൂര്: നവകേരള സദസിനായി മുഖ്യമന്ത്രിയും മന്ത്രിമാരും സഞ്ചരിക്കുന്ന ബസിന് നേരെ യൂത്ത് കോണ്ഗ്രസ് പ്രവര്ത്തകര് കരിങ്കൊടി കാട്ടി. പഴയങ്ങാടി എരിപുരത്ത് വച്ച് കരിങ്കൊടി കാട്ടിയ പ്രതിഷേധക്കാരെ ഡിവൈഎഫ്ഐ പ്രവര്ത്തകര് മര്ദിച്ചു.
യൂത്ത് കോണ്ഗ്രസ് ജില്ലാ വൈസ് പ്രസിഡന്റ് മഹിത, സുധീഷ് എന്നിവരാണ് അപ്രതീക്ഷിതമായി വാഹനത്തിന് മുന്നിലേക്ക് കരിങ്കൊടിയുമായി ചാടി വീണത്. തുടര്ന്ന് ഡിവൈഎഫ്ഐ പ്രവര്ത്തകര് ഇവരെ കൂട്ടം ചേര്ന്ന് മര്ദിക്കുകയായിരുന്നു. പിന്നാലെ പൊലീസെത്തി യൂത്ത് കോണ്ഗ്രസ് പ്രവര്ത്തകരെ കസ്റ്റഡിയിലെടുത്തു. ഇതിനിടെ പ്രദേശത്ത് ഡിവൈഎഫ്ഐ- യൂത്ത് കോണ്ഗ്രസ് പ്രവര്ത്തകര് ഏറ്റുമുട്ടി.
സംഘര്ഷത്തില് പരിക്കേറ്റ യൂത്ത് കോണ്ഗ്രസ് പ്രവര്ത്തകരെ തളിപ്പറമ്പിലെ സ്വകാര്യ ആശുപത്രിയില് പ്രവേശിപ്പിച്ചു. പൊലീസ് കസ്റ്റഡിയിലെടുത്ത യൂത്ത് കോണ്ഗ്രസ് പ്രവര്ത്തകരെ സ്റ്റേഷന് അകത്തുവച്ചും ഡിവൈഎഫ് ഐ പ്രവര്ത്തകര് മര്ദിച്ചതായി പരാതിയുണ്ട്.
