മലപ്പുറം: നവ കേരള സദസ് പോസ്റ്ററില്‍ നിന്നും മന്ത്രി കെ രാധാകൃഷ്ണനെ ഒഴിവാക്കി.കൊയിലാണ്ടി നിയമസഭ മണ്ഡലം കമ്മിറ്റി അടിച്ച നവ കേരള സദസിന്റെ പോസ്റ്ററിലാണ് മന്ത്രി കെ രാധാകൃഷ്ണന്‍ ഉള്‍പ്പെടാതിരുന്നത്.
എന്നാല്‍ സാങ്കേതിക പിഴവാണെന്ന് നേതാക്കള്‍ വിശദീകരിച്ചു. പിഴവ് കണ്ടെത്തിയതോടെ പോസ്റ്റര്‍ മാറ്റി സ്ഥാപിച്ചു. ഈ മാസം 25 നാണ് കൊയിലാണ്ടിയില്‍ നവകേരള സദസ്.
അതേസമയം മഞ്ചേശ്വരത്തെ പൈവളികെ സര്‍ക്കാര്‍ ഹയര്‍ സെക്കന്‍ഡറി സ്‌കൂളില്‍ മുഖ്യമന്ത്രി പിണറായി വിജയന്‍ ഇന്ന് നവകേരള സദസ് സംസ്ഥാനതല ഉദ്ഘാടനം നിര്‍വഹിച്ചു. നവകേരള സദസ് സര്‍ക്കാര്‍ പരിപാടിയാണെന്ന് മുഖ്യമന്ത്രി പറഞ്ഞു. പരിപാടിയില്‍ നിന്ന് വിട്ട് നില്‍ക്കുന്നത് ജനാധിപത്യ പ്രക്രിയക്ക് വിരുദ്ധമാണെന്ന് പറഞ്ഞ മഞ്ചേശ്വരം എം എല്‍ എ വിട്ടുനിന്നത് മുസ്ലീം ലീഗ് ആവശ്യപ്പെട്ടിട്ടാണെന്നും ചൂണ്ടിക്കാട്ടി.
ഈ പരിപാടിയില്‍ പ്രധാന റോളില്‍ എംഎല്‍എ ഉണ്ടാകണമായിരുന്നു എന്ന് മുഖ്യമന്ത്രി പറഞ്ഞു. അതേസമയം വേദിയില്‍ പ്രതിപക്ഷത്തെ മുഖ്യമന്ത്രി രൂക്ഷമായി വിമര്‍ശിച്ചു.
