ദാമോ(മധ്യപ്രദേശ്): കോണ്‍ഗ്രസിനെ കുടിച്ച വെള്ളത്തില്‍ പോലും വിശ്വസിക്കരുത്… പറയുന്നത് മായാവതി. ജാതിസെന്‍സസ് എന്നത് കോണ്‍ഗ്രസിന്റെ വ്യാജ വാഗ്ദാനമാണ്. അവര്‍ ഒന്നും ചെയ്യില്ല.
മണ്ഡല്‍ കമ്മിഷനെ തിരിഞ്ഞുനോക്കാത്തവരാണ് വോട്ട് തട്ടാന്‍ വേണ്ടി പുതിയ ചീട്ട് ഇറക്കരുത്. അവര്‍ നമ്മളെ കബളിപ്പിക്കും. അവരെ വിശ്വസിക്കാന്‍ കൊള്ളില്ല…. മധ്യപ്രദേശിലെ ദാമോ ജില്ലയില്‍ പതാരിയ മണ്ഡലത്തില്‍ ബിഎസ്പി പ്രചാരണറാലിയില്‍ സംസാരിക്കുമ്പോഴാണ് മായാവതി ആഞ്ഞടിച്ചത്.
സ്വാതന്ത്ര്യം കിട്ടി 75 വര്‍ഷം പിന്നിട്ടു. ഇവരല്ലേ ഭരിച്ചത്. ഇപ്പോഴെന്തിനാണ് ജാതിക്കണക്ക് തെരയുന്നത്. നമ്മള്‍ പിന്നാക്കക്കാര്‍ എത്ര വര്‍ഷമായി ദാരിദ്ര്യത്തിലാണ്. ഇന്നേവരെ അത് കാണാത്തവര്‍ ജാതിക്കണക്ക് എടുക്കുന്നത് പ്രഹസനമാണ്.
സ്വാതന്ത്ര്യലബ്ധിക്ക് ശേഷം കോണ്‍ഗ്രസ് ഭരണത്തിന് കീഴില്‍ കാക്കാ കാലേല്‍ക്കര്‍ കമ്മിഷനും മണ്ഡല്‍ കമ്മിഷനും ഒബിസിസംവരണം ശിപാര്‍ശ ചെയ്തില്ലേ. റിപ്പോര്‍ട്ടുകള്‍ക്കുമേല്‍ അടയിരുന്നതല്ലാതെ ഇവരെന്ത് ചെയ്തു.
ഭരണഘടനാ ശില്പി ഡോ. ബി.ആര്‍. അംബേദ്കറിനെ ഇവര്‍ മാനിച്ചിട്ടില്ല. പിന്നെയാണ് പിന്നാക്കക്കാരെ മാനിക്കുന്നത്. അംബേദ്കറിന് ഭാരതരത്‌ന നല്കാനുള്ള ഒരു നടപടിയും കോണ്‍ഗ്രസ് സര്‍ക്കാര്‍ കൈക്കൊണ്ടിട്ടില്ല, മായാവതി പറഞ്ഞു.
