കൊച്ചി : സംസ്ഥാനം കടുത്ത സാമ്പത്തിക പ്രതിസന്ധിയിലൂടെയാണ് കടന്നു പോകുന്നത്. സാമ്പത്തിക പ്രതിസന്ധിമൂലമാണ് കെഎസ്ആര്ടിസി പെന്ഷന് വിതരണത്തിന് പണം അനുവദിക്കാന് സാധിക്കാത്തതെന്ന് ചീഫ് സെക്രട്ടറി വി. വേണു. കെഎസ്ആര്ടിസിയിലെ പെന്ഷന് വൈകുന്നതിനെതിരായ ഹര്ജിയിലാണ് ചീഫ് സെക്രട്ടറി ഓണ്ലൈനിലൂടെ ഹാജരായാണ് ഇക്കാര്യം അറിയിച്ചത്.
ദൈനംദിന പ്രവര്ത്തനങ്ങള്ക്ക് പോലും പണം കണ്ടെത്താന് ബുദ്ധിമുട്ടിലാണ് സംസ്ഥാനം കടന്നു പോകുന്നത്. സാമ്പത്തിക പ്രതിസന്ധി നിലനില്ക്കുന്നതിനാലാണ് പെന്ഷന് അനുവദിക്കാന് വൈകുന്നത്. അതേസമയം നവംബര് 30നുള്ളില് ഒക്ടോബര്- നവംബര് മാസത്തെ പെന്ഷന് നല്കണമെന്ന് കോടതി നിര്ദ്ദേശിച്ചു. ഇത് നല്കിയില്ലെങ്കില് ചീഫ് സെക്രട്ടറിയും കെഎസ്ആര്ടിസി എംഡിയും കോടതിയില് ഹാജരാകണം.
മനുഷ്യന്റെ ജീവിത പ്രശ്നങ്ങള്ക്കാണ് പ്രാധാന്യം നല്കേണ്ടത് അല്ലാതെ ആഘോഷങ്ങള്ക്കല്ലെന്നും എന്ന് കോടതി വാക്കാല് പരാമര്ശിച്ചു. കേരളീയം പോലുള്ള ആഘോഷ പരിപാടികളേക്കാള് മനുഷ്യന്റെ ബുദ്ധിമുട്ടുകള്ക്കാണ് പ്രാധാന്യം നല്കേണ്ടതെന്നും കോടതി പറഞ്ഞു. ഇതോടെ ഒക്ടോബര് മാസത്തെ പെന്ഷന് ഈ മാസം 30 നകം കൊടുക്കുമെന്ന് സര്ക്കാര് ഉറപ്പ് നല്കി.
കെഎസ്ആര്ടിസി ജീവനക്കാരുടെ പെന്ഷന് മുടങ്ങിയതില് കഴിഞ്ഞ ദിവസം ഹൈക്കോടതി ഹര്ജി പരിഗണിച്ചിരുന്നു. എന്നാല് ചീഫ് സെക്രട്ടറി ഹാജരായിരുന്നില്ല. കേരളീയം ആഘോഷ പരിപാടിയുടെ തിരക്കിലാണെന്നും ഹാജരാകാന് സാധിക്കില്ലെന്നുമാണ് ചീഫ് സെക്രട്ടറി പകരം അറിയിച്ചത്. ഈ പ്രസ്താവനയെ രൂക്ഷമായി വിമര്ശിച്ച കോടതി നാണക്കേടുണ്ടാക്കുന്നതാണെന്നും പറഞ്ഞു. കൂടാതെ ചീഫ് സെക്രട്ടറി ഹാജരാകുന്നതിനായി ഹര്ജി പരിഗണിക്കുന്നത് ബുധനാഴ്ചത്തേയ്ക്ക് മാറ്റിവെയ്ക്കുകയായിരുന്നു.
