കൊച്ചി: ചെന്നൈ-ആലപ്പി എക്സ്പ്രസ് 13 മണിക്കൂര് വൈകിയത് മൂലം യാത്രക്കാരന് ഉണ്ടായ അസൗകര്യത്തിന് ദക്ഷിണ റെയില്വേ നഷ്ടപരിഹാരം നല്കണമെന്ന് എറണാകുളം ജില്ലാ ഉപഭോക്തൃ തര്ക്കപരിഹാര കമ്മിഷന്.
ഉന്നത ഉദ്യോഗസ്ഥനായ കാര്ത്തിക് മോഹന് ചെന്നൈയില് കമ്പനിയുടെ യോഗത്തില് പങ്കെടുക്കുന്നതിനാണ് ചെന്നൈ-ആലപ്പി എക്സ്പ്രസില് ടിക്കറ്റ് ബുക്ക് ചെയ്തത്. ട്രെയിന് കയറുന്നതിനായി എറണാകുളം റെയില്വേ സ്റ്റേഷനില് എത്തിയപ്പോഴാണ് ട്രെയിന് 13 മണിക്കൂര് വൈകുമെന്ന അറിയിപ്പ് ലഭിച്ചത്. ഇതുമൂലം പരാതിക്കാരന് ചെന്നൈയില് നടന്ന മീറ്റിങ്ങില് പങ്കെടുക്കാന് കഴിഞ്ഞില്ല. പിന്നീട് യാത്രക്കാരന് എറണാകുളം ജില്ലാ ഉപഭോക്തൃ തര്ക്കപരിഹാര കമ്മിഷനെ സമീപിക്കുകയായിരുന്നു.
റെയില്വെയുടെ വാദങ്ങളെ പൂര്ണമായും തള്ളിയ കമ്മിഷന്, ചെന്നൈ ഡിവിഷനിലെ ആര്ക്കോണത്ത് റെയില്വേ യാര്ഡ് പുനര്നിര്മാണ പ്രവര്ത്തനങ്ങള് നടന്നത് മൂലമാണ് ട്രെയിന് വൈകിയത് എന്നും, ഇത് നേരത്തെ അറിവുണ്ടായിരുന്നിട്ടും യാത്രക്കാര്ക്ക് മുന്കൂട്ടി വിവരങ്ങള് നല്കുന്നതിലും സൗകര്യങ്ങള് ഒരുക്കുന്നതിലും റെയില്വെ അധികൃതര് പരാജയപ്പെട്ടതായി കണ്ടെത്തി. സേവനത്തില് വീഴ്ചവരുത്തിയ ദക്ഷിണ റയില്വെ 50,000 രൂപ യാത്രക്കാരന് നഷ്ടപരിഹാരമായും 10,000 രൂപ കോടതി ചെലവായും 30 ദിവസത്തിനകം നല്കണമെന്ന് കമ്മിഷന് പ്രസിഡന്റ് ഡി.ബി. ബിനു, മെമ്പര്മാരായ വൈക്കം രാമചന്ദ്രന്, ടി.എന്. ശ്രീവിദ്യ എന്നിവരുടെ ബെഞ്ച് ഉത്തരവ് നല്കി.
