ചെന്നൈ: തമിഴ്നാട്ടിലെ തിരുവണ്ണാമലൈയില് കാറും ബസും കൂട്ടിയിടിച്ച് ഏഴു പേര് മരിച്ചു. കൃഷ്ണഗിരി ദേശീയപാതയില് ഇന്നലെ പുലര്ച്ചെയാണ് അപകടമുണ്ടായത്.
പുതുച്ചേരിയിലെ പശ നിര്മാണ ഫാക്ടറിയില് നിന്ന് വരുന്ന തൊഴിലാളികളടങ്ങുന്ന സംഘമാണ് അപകടത്തില്പ്പെട്ടത്. ഇവര് സഞ്ചരിച്ചിരുന്ന ടാറ്റ സുമോ തമിഴ്നാട് റോഡ് ട്രാന്സ്പോര്ട്ട് ബസുമായി കൂട്ടിയിടിക്കുകയായിരുന്നു. അപകടകാരണം വ്യക്തമല്ല. കാറില് സഞ്ചരിച്ചിരുന്ന ആസാം സ്വദേശികളായ ആറ് തൊഴിലാളികളും തമിഴ്നാട് സ്വദേശിയായ ഒരാളുമാണ് മരിച്ചത്. അഞ്ചുപേര്ക്ക് സംഭവസ്ഥലത്ത് വച്ച് തന്നെ ജീവന് നഷ്ടപ്പെടുകയായിരുന്നു. രണ്ടു പേര് ആശുപത്രിയില് വച്ചാണ് മരിച്ചത്. നിരവധിപേര്ക്ക് പരിക്കേറ്റിട്ടുണ്ട്. ഇവരെ സെന്ഗം സര്ക്കാര് ആശുപത്രിയിലേക്ക് മാറ്റി. 11 പേരാണ് ടാറ്റാ സുമോയില് ഉണ്ടായിരുന്നത്.
രണ്ടാഴ്ചയ്ക്കുള്ളില് ഉണ്ടാകുന്ന രണ്ടാമത്തെ വലിയ അപകടമാണിത്. ബസ് ഡ്രൈവര്ക്കെതിരെ എഫ്ഐആര് രജിസ്റ്റര് ചെയ്തതായും അന്വേഷണം നടക്കുകയാണെന്നും ഡിഐജി എം.എസ്. മധുസ്വാമി പറഞ്ഞു.
