ഭോപ്പാല്: നിയമസഭാ തെരഞ്ഞെടുപ്പ് അടുത്തു വരവെ മധ്യപ്രദേശില് കോണ്ഗ്രസിന് തിരിച്ചടി നല്കി കോണ്ഗ്രസ് എംഎല്എ സച്ചിന് ബിര്ള ബിജെപിയില് ചേര്ന്നു. മുഖ്യമന്ത്രി ശിവരാജ് സിംഗ് ചൗഹാന്, ബിജെ പി സംസ്ഥാന അധ്യക്ഷന് വി.ഡി ശര്മ്മ എന്നിവരുടെ സാന്നിധ്യത്തില് ഭോപ്പാലിലെ സംസ്ഥാന ആസ്ഥാന ഓഫീസില് എത്തിയാണ് സച്ചിന് ബിജെപി അംഗത്വം സ്വീകരിച്ചത്.
ഖാര്ഗോണ് ജില്ലയിലെ ബര്വ നിയമസഭ മണ്ഡലത്തില് നിന്നുള്ള കോണ്ഗ്രസ് എംഎല്എയാണ് സച്ചിന് ബിര്ള. 2021 ഒക്ടോബറില് സച്ചിന് കൂറുമാറിയെങ്കിലും നിയമസഭാംഗത്വം രാജിവയ്ക്കുകയോ അദ്ദേഹത്തെ പാര്ട്ടിയില് നിന്ന് പുറത്താക്കാന് കോണ്ഗ്രസോ നടപടി സ്വീകരിച്ചില്ല.
ബിജെപിക്ക് വേണ്ടി രണ്ട് വര്ഷമായി പ്രവര്ത്തിക്കുന്നുണ്ടെന്ന് സച്ചിന് ബിര്ള പറഞ്ഞു. ഔദ്യോഗികമായി ബിജെപി അംഗത്വം സ്വീകരിക്കുന്നത് ഇപ്പോഴാണ്. തെരഞ്ഞെടുപ്പില് മത്സരിക്കണോ എന്നത് പാര്ട്ടി തീരുമാനമാനിക്കുമെന്ന് ബിര്ള പ്രതികരിച്ചു.
2018 ലെ നിയമസഭാ തെരഞ്ഞെടുപ്പില് ബി ജെ പി സ്ഥാനാര്ത്ഥി ഹിതേന്ദ്ര സിംഗ് സോളങ്കിയെയാണ് സച്ചിന് ബിര്ള പരാജയപ്പെടുത്തിയത്. 30,000-ത്തിലധികം വോട്ടുകള്ക്കായിരുന്നു ജയം.
