തമിഴകത്തിന്റെ തലൈവര്‍ കേരളത്തിലേക്ക്. സൂപ്പര്‍താരം രജനീകാന്ത് ഈ മാസം മൂന്ന് മുതല്‍ 10 ദിവസം തിരുവനന്തപുരത്തുണ്ടാകുമെന്നാണ് അറിയുന്നത്.
പുതിയ സിനിമയുടെ ചിത്രീകരണത്തിനാണ് താരം തലസ്ഥാനത്തെത്തുന്നത്. രജനീകാന്തിന്റെ അടുത്ത ചിത്രമായ ‘തലൈവര്‍ 170’യുടെ ചിത്രീകരണമാണ് തിരുവനന്തപുരത്ത് നിശ്ചയിച്ചിട്ടുളളത്.
ആദ്യമായാണ് ഒരു രജനികാന്ത് ചിത്രം തിരുവനന്തപുരത്ത് ചിത്രീകരിക്കുന്നത്. അമിതാഭ് ബച്ചന്‍, മഞ്ജു വാര്യര്‍, ഫഹദ് ഫാസില്‍, റാണ ദഗുബാട്ടി തുടങ്ങിയവരാണ് ചിത്രത്തിലെ മറ്റു പ്രധാന അഭിനേതാക്കള്‍.ഇതില്‍ അമിതാഭ്ബച്ചന്‍ ഒഴികെയുള്ള താരങ്ങള്‍ തിരുവനന്തപുരത്തെത്തും. ടി ജെ ജ്ഞാനവേലാണ് സംവിധാനം. നാഗര്‍കോവില്‍, കന്യാകുമാരി എന്നിവിടങ്ങളിലും ചിത്രീകരണമുണ്ടാകും.
ലൈക പ്രൊഡക്ഷന്‍സിന്റെ ബാനറില്‍ സുബാസ്‌കരന്‍ ആണ് നിര്‍മ്മാണം. ഫഹദ് വില്ലന്‍ വേഷത്തിലാണെന്നാണ് റിപ്പോര്‍ട്ട്.ചിത്രത്തിന് സംഗീതം ഒരുക്കുന്നത് അനിരുദ്ധ് രവിചന്ദര്‍ ആണ്. രജനി എത്തുന്നതിനാല്‍ ശക്തമായ സുരക്ഷാ സംവിധാനം സജ്ജമാക്കും.
