ന്യൂഡൽഹി: സെപ്റ്റംബർ മാസത്തിലെ ജിഎസ്ടി കണക്കുകൾ പുറത്തുവിട്ട് കേന്ദ്ര ധനമന്ത്രാലയം. 1,62,712 കോടി രൂപയാണ് ചരക്കു-സേവന നികുതി ഇനത്തിൽ ലഭിച്ചത്. കഴിഞ്ഞ വർഷത്തെ കണക്കുകളെ അപേക്ഷിച്ച് 10 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നത്. 2023-24 സാമ്പത്തിക വർഷത്തിൽ നാലാം തവണയാണ് ജിഎസ്ടി വരുമാനം 1.60 ലക്ഷം കോടി കടക്കുന്നത്.
ഈ മാസം ലഭിച്ച ആകെ വരുമാനത്തിൽ സിജിഎസ്ടി വിഭാഗത്തിൽ 29,818 കോടി രൂപയും, എസ്ജിഎസ്ടി വിഭാഗത്തിൽ 37,657 കോടി രൂപ, ഐജിഎസ്ടി 83,623 കോടി രൂപ (ചരക്കുകളുടെ ഇറക്കുമതിയിൽ പിരിച്ചെടുത്ത 41,145 കോടി രൂപ ഉൾപ്പെടെ), സെസ് 11,613 കോടി രൂപ (ഇറക്കുമതിയിൽ ശേഖരിച്ച ചരക്കുകളുടെ 881 കോടി രൂപ ഉൾപ്പെടെ) എന്നിങ്ങനെയാണ് ലഭിച്ചത്.
ഈ സാമ്പത്തിക വർഷത്തിലെ ആദ്യപാദം അവസാനിക്കുമ്പോൾ 9,92,508 കോടി രൂപയാണ് ആകെ വരുമാനം. കഴിഞ്ഞ വർഷത്തെ കണക്കിനെ അപേക്ഷിച്ച് 11 ശതമാനത്തിന്റെ വർദ്ധനയാണ് രേഖപ്പെടുത്തിയത്.
