ഹാങ്ചൊ: പുരുഷ വോളിബോള് ക്വാര്ട്ടര് ഫൈനലില് ഭാരതത്തിന് ഇന്ന് വന് വെല്ലുവിളി. ഉച്ചയ്ക്ക് 12ന് നടക്കുന്ന പോരാട്ടത്തില് അതികരുത്തരും ഏഴ് തവണ ഏഷ്യന് ഗെയിംസില് സ്വര്ണം നേടിയവരുമായ ജപ്പാന് എതിരാളികള്.
ഗ്രൂപ്പ് ഘട്ടത്തില് കംബോഡിയയെ 3-0നും കരുത്തരായ ദക്ഷിണ കൊറിയയെ 3-2നും തകര്ത്ത് നോക്കൗട്ട് റൗണ്ടില് കടന്ന ടീം ഇന്ത്യ ചൈനീസ് തായ്പേയിയെ 3-0ന് കീഴടക്കിയാണ് ക്വാര്ട്ടറില് കളിക്കാനെത്തുന്നത്.
ജപ്പാന് അഫ്ഗാനെയും ഇന്തോനേഷ്യയെയും ഫിലിപ്പീന്സിനെയും ഗ്രൂപ്പ് ഘട്ടത്തില് തോല്പ്പിച്ചു. ഗ്രൂപ്പിലെ മൂന്ന് കളികളിലും നേരിട്ടുള്ള സെറ്റുകള്ക്കാണ് ജപ്പാന് വിജയിച്ചത്. നോക്കൗട്ട് റൗണ്ടില് കസാക്ക്സ്ഥാനെയും നേരിട്ടുള്ള സെറ്റുകള്ക്ക് തകര്ത്താണ് ജപ്പാന് ക്വാര്ട്ടറിലേക്ക് കുതിച്ചത്.
കഴിഞ്ഞ മൂന്ന് മത്സരങ്ങളും മികച്ച രീതിയില് വിജയിച്ച ഇന്ത്യ ഇന്ന് മറ്റൊരു അട്ടിമറി വിജയം നേടാമെന്ന പ്രതീക്ഷയിലാണ്. വിനിത്കുമാര് നായകനായ ടീമില് മുത്തുസ്വാമി അപ്പാവു, ഹരി പ്രസാദ്, മോഹന് ഉക്രപാണ്ഡ്യന്, എറിന് വര്ഗീസ് തുടങ്ങി പ്രമുഖ താരങ്ങളാണ് ഭാരതത്തിനായി അണിനിരക്കുന്നത്.
