കോഴിക്കോട്: പൗരാവകാശ പ്രവര്‍ത്തകന്‍ ഗ്രോ വാസുവിനെതിരായ കേസില്‍ വിധി ബുധനാഴ്ച. മെഡിക്കല്‍ കോളേജ് ആശുപത്രി മോര്‍ച്ചറി ഉപരോധിച്ചെന്ന കേസ് കെട്ടിച്ചമച്ചതാണെന്ന് ഗ്രോ വാസു കോടതിയില്‍ പറഞ്ഞു. ഗ്രോ വാസുവിന്റെ വാദം കേട്ട ശേഷമാണ് കുന്നമംഗലം ജുഡീഷ്യല്‍ ഒന്നാം ക്ലാസ് മജിസ്ട്രേറ്റ് കോടതി ബുധനാഴ്ച വിധി പറയാന്‍ മാറ്റിയത്.
കോടതി മുന്നറിയിപ്പ് നല്‍കിയിരുന്നെങ്കിലും മുദ്രാവാക്യം വിളിച്ചാണ് ഇത്തവണയും ഗ്രോ വാസുവെത്തിയത്.സാക്ഷി മൊഴികള്‍ വായിച്ചു കേള്‍പ്പിച്ച ശേഷം ഗ്രോ വാസുവിന്റെ വാദം കേട്ട കോടതി പ്രതി ചെയ്ത കുറ്റങ്ങള്‍ക്ക് തെളിവും സാക്ഷികളും എവിടെയെന്ന ചോദ്യത്തിന് പ്രോസിക്യൂഷന് മറുപടി ഉണ്ടായില്ല. മുദ്രാവാക്യം വിളിച്ചതിന് ശിക്ഷ ഏറ്റു വാങ്ങാന്‍ തയാറാണെന്നും ഗ്രോ വാസു കോടതിയെ അറിയിച്ചു.
മെഡിക്കല്‍ കോളേജില്‍ സംഘം ചേര്‍ന്നതിന് ആശുപത്രി അധികൃതര്‍ പരാതി നല്‍കിയിട്ടില്ലെന്നും വഴി തടസപ്പെടുത്തിയതിന് പരാതിക്കാര്‍ ഇല്ലെന്നും വാസു കോടതിയില്‍ പറഞ്ഞു. കൊല്ലപ്പെട്ട മാവോയിസ്റ്റുകള്‍ക്ക് നീതി കിട്ടിയില്ലെന്നും ഏറ്റുമുട്ടല്‍ കൊലയാണെങ്കില്‍ പൊലീസുകാര്‍ക്ക് പരിക്കേല്‍ക്കാത്തത് എന്തുകൊണ്ടെന്നും ഗ്രോ വാസു കോടതിയില്‍ ചോദിച്ചു. മനുഷ്യാവകാശ പ്രവര്‍ത്തകന്‍ എന്ന നിലയിലുളള പ്രതിഷേധം തന്റെ അവകാശമാണെന്നും ഗ്രോ വാസു കോടതിയില്‍ പറഞ്ഞു.
