തിരുവനന്തപുരം: അനാവശ്യ രാഷ്‌ട്രീയ ഇടപെടലുകളില്‍പ്പെട്ട് തകര്‍ന്നുപോ
യ കേരളത്തിന്റെ കാര്‍ഷിക സംസ്‌കാരം വീണ്ടെടുക്കണമെന്ന് ആര്‍എസ്എസ് പ്രാന്തപ്രചാരക് എസ്. സുദര്‍ശനന്‍. ഡിസം. 15ന് ഭാരതീയ കിസാന്‍ സംഘ് സംഘടിപ്പിക്കുന്ന കര്‍ഷക അവകാശപ്രഖ്യാപന റാലി സംഘാടകസമിതി രൂപീകരണ യോഗം കൈതമുക്ക് അനന്തപുരം ബാങ്ക് ആഡിറ്റോറിയത്തില്‍ ഉദ്ഘാടനം ചെയ്യുകയായിരുന്നു അദ്ദേഹം.
ഭാരതം ഗ്രാമകേന്ദ്രീകൃത കാര്‍ഷിക ജീവിതശൈലിയില്‍ അടിയുറച്ച നാടാണ്. നമ്മുടെ ഉത്സവങ്ങളും ആഘോഷങ്ങളുമെല്ലാം കൃഷിയുമായി ബന്ധപ്പെട്ടതായിരുന്നു. നമ്മുടെ കലകളിലും സാഹിത്യത്തിലും പി. കുഞ്ഞിരാമന്‍ നായരെ പോലുള്ള കവികളുടെ കവിതകളുമെല്ലാം കൃഷിയുമായി ബന്ധപ്പെട്ടിരിക്കുന്നു. എന്നാല്‍ അനാവശ്യ രാഷ്‌ട്രീയ ഇടപെടലുകള്‍ കേരളത്തിലെ കാര്‍ഷിക സംസ്‌കാരത്തെ ദോഷകരമായി ബാധിച്ചു. ഇതില്‍ നിന്നും കേരളത്തിന്റെ കാര്‍ഷിക സംസ്‌കാരത്തെ വീണ്ടെടുക്കാന്‍ ഭാരതീയ കിസാന്‍ സംഘിന്റെ പ്രവര്‍ത്തനങ്ങളിലൂടെ സാധിക്കണമെന്നും അദ്ദേഹം പറഞ്ഞു.
കൃഷിയുമായി ബന്ധപ്പെട്ട ആചാരങ്ങളും അനുഷ്ഠാനങ്ങളും പുതുതലമുറയില്‍ അന്യംനിന്നു. ഇവ പുനരുജ്ജീവിപ്പിക്കണം. കൂട്ടുകൃഷിയും അടുക്കളത്തോട്ട നിര്‍മാണവും പ്രോത്സാഹിപ്പിക്കണം. രാജ്യവിരുദ്ധ പ്രവര്‍ത്തനം നടത്തുന്നവര്‍ കര്‍ഷകരെ തെറ്റിദ്ധരിപ്പിച്ച് കലാപത്തിന് പ്രേരിപ്പിക്കുന്നത് ഒഴിവാക്കാന്‍ കാര്‍ഷികരംഗത്തിന് കേന്ദ്രസര്‍ക്കാര്‍ നല്‍കുന്ന അനവധി ആനുകൂല്യങ്ങള്‍ ജനങ്ങളിലെത്തിക്കണം. ഭാരതത്തിന്റെ കാര്‍ഷിക വസന്തത്തിന്റെ കാറ്റ് കേരളത്തിലേക്കും കടന്നുവരാനുള്ള സാഹചര്യമൊരുക്കണമെന്നും അദ്ദേഹം കൂട്ടിച്ചേര്‍ത്തു. കിസാന്‍ സംഘ് സംസ്ഥാന അധ്യക്ഷന്‍ ഡോ. അനില്‍ വൈദ്യമംഗലം അധ്യക്ഷത വഹിച്ചു. കേരളത്തിന്റെ കാര്‍ഷിക മേഖലയെ പുനരുജ്ജീവിപ്പിക്കുന്നതിന് സംഘടനാത്മകവും സര്‍ഗാത്മകവും സമരാത്മകവുമായ മാര്‍ഗങ്ങളിലൂടെ പ്രവര്‍ത്തനം വ്യാപിപ്പിക്കുമെന്ന് അനില്‍ വൈദ്യമംഗലം പറഞ്ഞു.
സംഘാടക സമിതി ഭാരവാഹികള്‍
കര്‍ഷക അവകാശപ്രഖ്യാപന റാലി സംഘാടകസമിതി രക്ഷാധികാരികളായി ഐഎസ്ആര്‍ഒ മുന്‍ ചെയര്‍മാന്‍ ഡോ. ജി. മാധവന്‍ നായര്‍, പങ്കജകസ്തൂരി എംഡി ഡോ. ഹരീന്ദ്രന്‍ നായര്‍, പാരമ്പര്യ നെല്‍കര്‍ഷകന്‍ ചെറുവയല്‍ രാമന്‍, ചലച്ചിത്ര സംവിധായകന്‍ വിജി തമ്പി, നബാര്‍ഡ് റിട്ട. ഡിജിഎം ഡോ. ഭാസ്‌കരന്‍, നന്ദകുമാര്‍ (ചേംമ്പര്‍ ഓഫ് കോമേഴ്‌സ്) എന്നിവരെയും ചെയര്‍മാനായി ഡോ. അനില്‍ വൈദ്യമംഗലത്തെയും തെരഞ്ഞെടുത്തു.
ഷാജി എസ്. നായര്‍, പ്രൊഫ. ലീലമ്മ, കെ. കൃഷ്ണന്‍കുട്ടി (സംസ്ഥാന ഗോസേവാ സംയോജകന്‍), നാരായണന്‍ (സംസ്ഥാന പര്യാവരണ്‍ സംയോജക്), പി. ശശീന്ദ്രന്‍ (ഗ്രാമവികാസ് പ്രാന്തീയ സംയോജകന്‍), കസ്തൂരി, എം. ഗോപാല്‍, അഡ്വ. രതീഷ്‌ഗോപാലന്‍ എന്നിവരാണ് വൈസ് ചെയര്‍മാന്മാര്‍. ജനറല്‍ കണ്‍വീനര്‍ അഡ്വ. കെ. മോഹന്‍കുമാര്‍. വിവിധ ജില്ലകളില്‍ നിന്നുമായി 101 അംഗ സംഘാടക സമിതിയും രൂപീകരിച്ചു.
