കൊച്ചി: പറമ്പിലെ അതിരു തര്ക്കത്തെ തുടര്ന്ന് അയല്വാസികളായ അച്ഛനെയും മകനെയും വെട്ടിക്കൊലപ്പെടുത്താന് ശ്രമിച്ച കേസില് വീട്ടമ്മ അറസ്റ്റിലായി. വടക്കേക്കര പട്ടണം കിഴക്കേത്തറ ബേബി (56) യെയാണ് പൊലീസ് അറസ്റ്റ് ചെയ്തത്.
പട്ടണം മുണ്ടേപ്പാടം ഭാഗത്ത് പുത്തേഴത്ത് വീട്ടില് ഷാജിയെയും മകന് വിഷ്ണുവിനെയും വീട്ടില് അതിക്രമിച്ചു കയറി വെട്ടി കൊലപ്പെടുത്താന് ശ്രമിച്ച കേസിലാണ് അറസ്റ്റ്. വര്ഷങ്ങളായി അതിര്ത്തിവേലി സംബന്ധിച്ച് ഇവര് തമ്മില് തര്ക്കം നില നില്ക്കുകയായിരുന്നു എന്നാണ് വിവരം.
ബേബി അതിര്ത്തി വേലി പൊളിച്ച് പണിയുന്നത് വിഷ്ണു ചോദ്യം ചെയ്തതാണ് പ്രകോപന കാരണം.വിഷ്ണുവിന്റെ വീട്ടില് അതിക്രമിച്ചു കയറിയ ബേബി കൈവശം ഉണ്ടായിരുന്ന വാക്കത്തി കൊണ്ട് വിഷ്ണുവിനെ ആക്രമിക്കുകയും തടയാന് ശ്രമിച്ച അച്ഛന് ഷാജിയെ വെട്ടുകയുമായിരുന്നു.
ആക്രമണത്തില് പരിക്കേറ്റ ഷാജിയും വിഷ്ണുവും ആശുപത്രിയിലാണ്. വടക്കേക്കര പൊലീസ് ഇന്സ്പെക്ടര് വി.സി.സൂരജിന്റെ നേതൃത്വത്തിലാണ് അറസ്റ്റ്. ബേബിയെ കോടതിയില് ഹാജരാക്കി റിമാന്ഡ് ചെയ്തു.
