മായന്നൂര്: മായന്നൂര് ശ്രീകുറുമ്പ ഭഗവതി ക്ഷേത്രത്തില് ഒരു ഭക്തന് വഴിപാടായി സമര്പ്പിച്ച് നിര്മിക്കുന്ന ഓഫീസ് കെട്ടിടവും അതിഥി മന്ദിരവുമായ ശാന്തിമഠത്തിന്റെ നിര്മാണോദ്ഘാടനം കഴിഞ്ഞിട്ട് രണ്ട് വര്ഷമായി. ശാന്തിമഠം പക്ഷെ, ഇപ്പോഴും കടലാസില് തന്നെ.
മന്ത്രി കെ. രാധാകൃഷ്ണന് ഉദ്ഘാടനം നിര്വഹിച്ചത് 2021 ജൂലൈ 31 നായിരുന്നു. രണ്ട് വര്ഷങ്ങള് പിന്നിടുന്ന സാഹചര്യത്തിലും ശാന്തിമഠത്തിന്റെ പണികള് ഒന്നുമായില്ലെന്ന് ക്ഷേത്ര ഉപദേശകസമിതി അംഗവും ബിജെപി കൊണ്ടാഴി പഞ്ചായത്ത് കമ്മിറ്റി പ്രസിഡന്റുമായ പി. ഹരിഹരന് പറഞ്ഞു.
ഭക്തനില് നിന്നും കെട്ടിട നിര്മാണത്തിനാവശ്യമായ മുഴുവന് തുകയും കൈപ്പറ്റി മുന് ഉപദേശകസമിതി പ്രസിഡന്റ് നടത്തിയ അനധികൃത പണമിടപാടുകളെക്കുറിച്ചും കരാറുകാരന്റെ മെല്ലെപ്പോക്ക് സമീപനത്തെ പറ്റിയും അന്വേഷിച്ച് നടപടികള് സ്വീകരിക്കാന് വകുപ്പ് മന്ത്രി തയ്യാറാവണമെന്നും അദ്ദേഹം പറഞ്ഞു. ഇനിയും ഈ സമീപനം തുടര്ന്നാല് ഭക്തജനങ്ങളെ അണിനിരത്തി പ്രക്ഷോഭ പരിപാടികളുമായി മുന്നോട്ട് പോകുമെന്നും ക്ഷേത്ര ഉപദേശകസമിതി വ്യക്തമാക്കുന്നു.
