ആലപ്പുഴ: ചിക്കന് കടകളില് ചിക്കന് വാങ്ങാനെന്ന വ്യാജേന എത്തി കടയുടമയുടെ ശ്രദ്ധ മാറ്റി പണം കവരുന്ന പ്രതി പിടിയില്. പത്തനംതിട്ട മെഴുവേലി വില്ലേജില് ഇലവുംതിട്ട പ്ലാന്തോട്ടത്തില് വീട്ടില് റിനു റോയി (30) യെയാണ് അറസ്റ്റ് ചെയ്തത്. മാങ്കാംകുഴിയിലുള്ള സാന്ദ്രന് എന്നയാളുടെ ഉടമസ്ഥതയിലുള്ള ചിക്കന് കടയില് നിന്നും മോഷണം നടത്തി പോകുന്ന വഴിയാണ് പ്രതിയെ അറസ്റ്റ് ചെയ്തത് .
പരിസരപ്രദേശങ്ങളില് സമാന രീതിയിലുള്ള മോഷണം നടന്നതിനെ തുടര്ന്ന് പോലീസ് നിരീക്ഷണം നടത്തി വരികയായിരുന്നു. കഴിഞ്ഞ രണ്ടിന് നൂറനാട് പോലീസ് സ്റ്റേഷന് പരിധിയിലെ ഒരു കോഴിക്കടയില് നിന്നും 8000 രൂപയും, മൂന്നിന് മാവേലിക്കര പോലീസ് സ്റ്റേഷന് പരിധിയിലെ ഒരു കോഴിക്കടയില് നിന്നും 12000 രൂപയും, പത്തിന് പത്തനംതിട്ട കീഴ്വായിപ്പൂര് പോലീസ് സ്റ്റേഷന് പരിധിയിലുള്ള ഒരു കോഴിക്കടയില് നിന്നും 19500 രൂപയും ഉള്പ്പെടെ 39500 രൂപായോളം മോഷണം നടത്തിയതായി പ്രതി സമ്മതിച്ചിട്ടുണ്ട്. മോഷണം ചെയ്തെടുത്ത മുഴുവന് പണവും പ്രതിയുടെ വീട്ടില് നിന്നും പിടിച്ചെടുത്തു.
കുറത്തികാട് പോലീസ് ഇന്സ്പെക്ടര് പി.കെ മോഹിതിന്റെ നേതൃത്വത്തിലാണ് പ്രതിയെ അറസ്റ്റ് ചെയ്തത്. മാവേലിക്കര ഫസ്റ്റ് ക്ലാസ്സ് മജിസ്ട്രേറ്റ് കോടതി ഒന്നില് ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്ത് മാവേലിക്കര സബ് ജയിലിലേക്ക് അയച്ചു.
