തിരുവനന്തപുരം: മുസ്ലിം സമുദായത്തെ സിപിഎം അരക്ഷിതാവസ്ഥയിലേക്ക് തള്ളിവിടാന്‍ ശ്രമിക്കുകയാണെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. വ്യക്തിനിയമങ്ങളില്‍ മാറ്റം വരണമെന്ന് ഇഎംഎസിന്റെ കാലം മുതല്‍ ആവശ്യപ്പെടുന്ന സിപിഎം ഇപ്പോള്‍ യൂടേണ്‍ അടിച്ചത് വോട്ട് ബാങ്കില്‍ കണ്ണുവച്ചാണ്. കേരളത്തില്‍ മതധ്രുവീകരണം നടത്തി പാര്‍ലമെന്റ് തെരഞ്ഞെടുപ്പില്‍ നേട്ടമുണ്ടാക്കാനാണ് അവര്‍ കോഴിക്കോട് സെമിനാര്‍ നടത്തിയത്.
സീതാറാം യെച്ചൂരി കാപട്യത്തിന്റെ അപ്പോസ്തലനാണ്. ഒരു മതവിഭാഗത്തിന്റെ ആചാരാനുഷ്ഠാനങ്ങളില്‍ മാറ്റം വരുത്തേണ്ടത് അവര്‍ തന്നെയാണെന്നാണ് സീതാറാം യെച്ചൂരി കോഴിക്കോട് പറഞ്ഞത്. എന്നാല്‍ ശബരിമലയിലെ ആചാരങ്ങള്‍ മാറ്റാനായിരുന്നു പിണറായി സര്‍ക്കാരിനും സിപിഎമ്മിനും ധൃതിയെന്നും കെ. സുരേന്ദ്രന്‍ പറഞ്ഞു. ഇനിയെങ്കിലും അയ്യപ്പഭക്തന്മാരോട് മാപ്പ് പറയാന്‍ സിപിഎമ്മും സംസ്ഥാന സര്‍ക്കാരും തയാറാവണം.
അനാവശ്യ വിവാദങ്ങള്‍ ഉയര്‍ത്തി മുസ്ലിംങ്ങളെ ഭയപ്പെടുത്തി കൂടെ നിര്‍ത്താനാണ് കമ്മ്യൂണിസ്റ്റുകാര്‍ ശ്രമിക്കുന്നത്. വര്‍ഗീയ കലാപമുണ്ടാക്കുന്ന പ്രചരണത്തില്‍ നിന്ന് മാര്‍കിസ്റ്റ് പാര്‍ട്ടി വിട്ടു നില്‍ക്കണം.
കേരളത്തില്‍ മോദി സര്‍ക്കാരിന്റെ വികസനവും ജനക്ഷേമനയങ്ങളും ചര്‍ച്ചയാകാതിരിക്കാനാണ് ഇത്തരം കാമ്പയിന്‍ നടത്താന്‍ സിപിഎം മുന്നിട്ടിറങ്ങുന്നത്. എന്നാല്‍ സിപിഎമ്മിന്റെ ഇരട്ടത്താപ്പും കപടതയും കേരളം തിരിച്ചറിയുമെന്നും കെ. സുരേന്ദ്രന്‍ പറഞ്ഞു.
