നിര്മ്മിത ബുദ്ധി ഉപയോഗിച്ച് വ്യത്യസ്ത ചിത്രങ്ങള് സൃഷ്ടിച്ച് സമൂഹമാധ്യമങ്ങളിലൂടെ പുറത്തുവിടുന്നതാണ് സമീപ കാലത്ത് കണ്ടുവരുന്ന രീതി.
അപാര സാധ്യതകളുളള ആര്ട്ടിഫിഷ്യല് ഇന്റലിജന്സിന് ഇങ്ങനെ ആള്ക്കാരെ രസിപ്പിക്കാനും കഴിയും.
സാങ്കല്പ്പിക സാഹചര്യങ്ങള് പുനര്സൃഷ്ടിക്കുന്നതോ സെലിബ്രിറ്റികളെ പുതിയ രൂപത്തില് പുനര്നിര്മ്മിക്കുന്നതോ ആയ പോസ്റ്റുകള് സാമൂഹ്യ മാധ്യമങ്ങളില് നിറയുകയാണ്. ഇലോണ് മസ്കിനെ ഇന്ത്യന് രൂപത്തിലുളള വരനാക്കി മാറ്റിയുളള ചിത്രങ്ങള്, കല്യാണം ഇന്ത്യയിലാണെങ്കില് അദ്ദേഹത്തിന്റെ സുഹൃത്തുക്കളുടെ കഥാപാത്രങ്ങള് എങ്ങനെ കാണപ്പെടുമെന്നുളളത് തുടങ്ങി ഇന്റര്നെറ്റില് വൈവിധ്യമാര്ന്ന രസകരമായ ചിത്രങ്ങള് കണ്ടെത്താനാകും.
ഈ പട്ടികയിലേക്ക് ഫാഷന് ഇ കോമേഴ്സ് കമ്പനിയായ മിന്ത്രയും ചേര്ന്നു കഴിഞ്ഞു. ബോളിവുഡ് നടി രേഖയെ ബാര്ബി പാവയായി നിര്മ്മിത ബുദ്ധിയിലൂടെ പുനര്നിര്മ്മിച്ചിരിക്കുകയാണ് മിന്ത്ര.
രേഖയെ ബാര്ബിയായി പുനര്സൃഷ്ടിക്കാന് ഞങ്ങള് ആര്ട്ടിഫിഷ്യല് ഇന്റലിജന്സിനോടാവശ്യപ്പെട്ടു.ഉടന് തന്നെ നടിയുടെ ബാര്ബി പാവ രൂപത്തിലുളള ചിത്രങ്ങള് സൃഷ്ടിക്കപ്പെട്ടു. പിങ്ക് നിറത്തിലുളള വസ്ത്രം ധരിച്ച ബാര്ബി രേഖയെ കാണാന് തന്നെ കൗതുകമാണ്- മിന്ത്ര അധികൃതര് കുറിച്ചു.
ഒരു ദിവസം മുമ്പാണ് പോസ്റ്റ് ഷെയര് ചെയ്തത്. ഷെയര് ചെയ്തതിന് ശേഷം 2,400 ഓളം ലൈക്കുകള് നേടി. കൂടാതെ, വിവിധ സാമൂഹ്യ മാധ്യമ പ്ലാറ്റ്ഫോമുകളില് ചിത്രങ്ങള് വീണ്ടും പോസ്റ്റ് ചെയ്യപ്പെടുന്നു. ആര്ട്ടിഫിഷ്യന് ഇന്റലിജന്സ് സൃഷ്ടിച്ച ചിത്രങ്ങളില് അത്ഭുതം കൂറുകയാണ് ആളുകള്.
ദിവസങ്ങള്ക്ക് മുമ്പ്, ആദിപുരുഷ് ചിത്രത്തിലെ സെയ്ഫ് അലി ഖാന്റെ ലങ്കേഷ് എന്ന കഥാപാത്രത്തെ ആര്ട്ടിഫിഷ്യല് ഇന്റലിജന്സ് പുനര്സൃഷ്ടിച്ചത് വൈറലായിരുന്നു.
