മീററ്റ്: ഇന്ത്യന് മുന് ക്രിക്കറ്റ് താരം പ്രവീണ് കുമാറിന്റെ കാര് അപകടത്തില്പ്പെട്ടു. കഴിഞ്ഞ ദിവസം രാത്രിയാണ് പ്രവീണ്കുമാറും മകനും സഞ്ചരിച്ച കാര് മീററ്റില് അപകടത്തില്പ്പെട്ടത്. പ്രവീണ് കുമാറും മകനും പരിക്കുകളില്ലാതെ രക്ഷപ്പെട്ടു. ഇവര് സഞ്ചരിച്ച എസ്യുവി ട്രെയിലര് ട്രക്കുമായി കൂട്ടിയിടിക്കുകയായിരുന്നു. കുടുംബത്തോടൊപ്പം മീററ്റിലാണ് പ്രവീണ് കുമാര് താമസിക്കുന്നത്. ഇവര് സഞ്ചരിച്ചിരുന്ന ലാന്ഡ് റോവറിലേക്ക് അമിത വേഗത്തിലെത്തിയ ട്രക്ക് പാഞ്ഞുകയറുകയായിരുന്നു. പ്രവീണ് കുമാറും മകനും അത്ഭുതകരമായാണ് രക്ഷപ്പെട്ടത്. കാറിന് കാര്യമായി കേടുപാടുകള് സംഭവിച്ചു. സ്ഥലത്തെത്തിയ പൊലീസ് ട്രക്ക് ഡ്രൈവറെ അറസ്റ്റ് ചെയ്തു. അപകടത്തില് കാര് പൂര്ണമായും തകര്ന്നു.
2007ലും പ്രവീണ് കുമാര് അപകടത്തില്പ്പെട്ടിരുന്നു. ഇന്ത്യന് ടീമിലെത്തിയതിന് പിന്നാലെ നാട്ടിലേക്ക് വന്ന പ്രവീണ് കുമാറിന് നാട്ടുകാര് നല്കിയ ഗംഭീര സ്വീകരണത്തിനിടെ, തുറന്ന ജീപ്പില് നിന്ന് താരം താഴെ വീഴുകയായിരുന്നു.
സ്വിങ് ബൗളിങ്ങില് പേരുകേട്ട പ്രവീണ് കുമാര് ഇന്ത്യക്കായി ആറ് ടെസ്റ്റ്, 68 ഏകദിനം, 10 ട്വന്റി20 മത്സരങ്ങള് കളിച്ചിട്ടുണ്ട്.
