ബൊകാജാന്‍ (ആസാം): വടക്കുകിഴക്കന്‍ മേഖലയിലെ ഗോത്രവര്‍ഗ സംഘര്‍ഷങ്ങളില്‍ പ്രധാന പങ്കുവഹിച്ചിരുന്ന ആദിവാസി പീപ്പിള്‍സ് ലിബറേഷന്‍ ആര്‍മിയുടെ (എപിഎല്‍എ) പ്രവര്‍ത്തകര്‍ ആയുധം വച്ച് കീഴടങ്ങി. ആസാം റൈഫിള്‍സിന്റെ അതിപ്രധാനമായ ഒരു ഇടപെടലിലൂടെയാണ് 39 അംഗ സംഘം കഴിഞ്ഞ ദിവസം ബൊകാജാന്‍ പോലീസ് സ്റ്റേഷനിലെത്തി കീഴടങ്ങിയത്. എകെ സീരീസ് റൈഫിളുകള്‍, 19 പിസ്റ്റളുകള്‍, അഞ്ച് മറ്റ് റൈഫിളുകള്‍, രണ്ട് ഗ്രനേഡ് തുടങ്ങിയവയുമായാണ് ഇവര്‍ പോലീസ് സ്റ്റേഷനിലെത്തിയത്.
ആസാം റൈഫിള്‍സിന്റെ ഓപ്പറേഷന്‍ സമര്‍പ്പണിന്റെ വിജയമായാണ് എപിഎല്‍എയുടെ കീഴടങ്ങലിനെ വിലയിരുത്തുന്നത്. അവര്‍ ജീവിതത്തിലേക്കും സമാധാനത്തിലേക്കും മടങ്ങുകയാണെന്നാണ് ആസാം റൈഫിള്‍സ് പുറത്തിറക്കിയ പത്രക്കുറിപ്പില്‍ ഇതേപ്പറ്റി വിശേഷിപ്പിച്ചത്. മെയ് 26ന് മണിപ്പൂരില്‍ ഉഖ്‌റുല്‍ പോലീസ് സ്റ്റേഷനില്‍ കാങ്ഗിലിപാക് കമ്മ്യൂണിസ്റ്റ് പാര്‍ട്ടിയുടെ അഞ്ച് തീവ്രവാദികള്‍ കീഴടങ്ങിയിരുന്നു.
