തിരുവനന്തപുരം: ഇറാനില് തടവിലാക്കപ്പെട്ട മത്സ്യത്തൊഴിലാളികളെ തിരികെ എത്തിക്കാന് ഉള്ള ശ്രമങ്ങള് ഊര്ജിതമെന്ന് കേന്ദ്ര വിദേശകാര്യ സഹമന്ത്രി വി. മുരളീധരന്. വിദേശകാര്യ മന്ത്രാലയവും എംബസിയും ഇറാന് അധികൃതരുമായി ബന്ധപ്പെട്ടിരുന്നു.
മത്സ്യ തൊഴിലാളികള് എവിടെ ആണ് കസ്റ്റഡിയില് ഉള്ളതെന്ന് സ്ഥിരീകരിച്ചിട്ടുണ്ട്. ഇന്ത്യന് പ്രതിനിധികള് ഉടന് തന്നെ അവരുമായി കൂടിക്കാഴ്ച നടത്തുമെന്നും അതിനുള്ള നടപടി ക്രമങ്ങള് പുരോഗമിക്കുകയാണെന്നും കേന്ദ്രമന്ത്രി പറഞ്ഞു. തൊഴിലാളികളുടെ കുടുംബാംഗങ്ങളെ നേരില് സന്ദര്ശിച്ച് സമാശ്വസിപ്പിച്ച ശേഷം അഞ്ചുതെങ്ങില് മാധ്യമങ്ങളോട് സംസാരിക്കുകയായിരുന്നു വിദേശകാര്യ സഹമന്ത്രി.
നയതന്ത്ര സമ്മര്ദ്ദം ചെലുത്തി തൊഴിലാളികളെ ഉടന് മോചിപ്പിക്കാന് ആകുമെന്നാണ് പ്രതീക്ഷ എന്നും വി. മുരളീധരന് പറഞ്ഞു. ആശങ്കപ്പെടേണ്ട സാഹചര്യം ഇല്ലെന്നും നരേന്ദ്രമോദിയുടെ ഭരണകാലത്ത് രാജ്യാന്തര തലത്തില് ഇത്തരം വിഷയങ്ങളില് അതിവേഗ ഇടപെടലുകള് ഉണ്ടാകുന്നുണ്ടെന്നും മന്ത്രി കൂട്ടിച്ചേര്ത്തു. നൈജീരിയയില് തടവിലാക്കപ്പെട്ട കൊല്ലം സ്വദേശികളെ ഇക്കഴിഞ്ഞ ദിവസം നാട്ടില് തിരികെ എത്തിച്ച സംഭവം ഉദാഹരിച്ച മന്ത്രി പ്രതീക്ഷയോടെ ആണ് ഇടപെടലുകളെ നോക്കി കാണുന്നത് എന്നും പറഞ്ഞു.
