തിരുവനന്തപുരം: ആരോഗ്യപ്രവര്ത്തകരുടേയും ആശുപത്രികളുടേയും സുരക്ഷിതത്വത്തിന് സംസ്ഥാനത്തെ ആശുപത്രികളില് കോഡ് ഗ്രേ പ്രോട്ടോക്കോള് നടപ്പിലാക്കുമെന്ന് മന്ത്രി വീണാ ജോര്ജ്. ആരോഗ്യപ്രവര്ത്തകര്ക്ക് നേരെയുള്ള അതിക്രമങ്ങള് തടയാനും അതിക്രമമുണ്ടായാല് പാലിക്കേണ്ടതുമായ നടപടിക്രമങ്ങളാണ് കോഡ് ഗ്രേ പ്രോട്ടോക്കോള് എന്നറിയപ്പെടുന്നത്.
വികസിത രാജ്യങ്ങളിലുള്ള പ്രോട്ടോക്കോളുകളുടെ മാതൃകയിലാണ് നമ്മുടെ സംസ്ഥാനത്തിന് അനുയോജ്യമായ രീതിയില് കോഡ് ഗ്രേ പ്രോട്ടോക്കോള് ആവിഷ്ക്കരിക്കുന്നത്. കോഡ് ഗ്രേ പ്രോട്ടോക്കോള് ശില്പശാല ഉദ്ഘാടനം ചെയ്യുകയായിരുന്നു മന്ത്രി. ആരോഗ്യപ്രവര്ത്തകര്ക്ക് നേരെയുള്ള അതിക്രമങ്ങള് തടയുന്നതിന് വേണ്ടി സാധ്യമായിട്ടുള്ള എല്ലാ കാര്യങ്ങളും ചെയ്യുക എന്നത് തന്നെയാണ് ലക്ഷ്യമിടുന്നത്.
ആശുപത്രികളില് സേഫ്റ്റി ഓഡിറ്റ് നടത്തിവരുന്നു. ഭൂരിപക്ഷം ആശുപത്രികളിലും സേഫ്റ്റി ഓഡിറ്റ് പൂര്ത്തിയാക്കിയിട്ടുണ്ടെന്നും മന്ത്രി വ്യക്തമാക്കി. ഐജി ഹര്ഷിത അട്ടല്ലൂരി, സിറ്റി പോലീസ് കമ്മിഷണര് സി.എച്ച്. നാഗരാജു, മെഡിക്കല് വിദ്യാഭ്യാസ വകുപ്പ് സെക്രട്ടറി ഡോ. രത്തന് ഖേല്ക്കര്, ആരോഗ്യ വകുപ്പ് ഡയറക്ടര് ഡോ. കെ.ജെ. റീന, മെഡിക്കല് വിദ്യാഭ്യാസ വകുപ്പ് ഡയറക്ടര് ഡോ. തോമസ് മാത്യു എന്നിവര് സംസാരിച്ചു.
