ന്യൂദല്ഹി: ഇന്ത്യന് പേസ് ബോളര് ജസ്പ്രീത് സിങ് ബുംറയെ ടീമില് തിരിച്ചെത്തിക്കാനുള്ള ശ്രമം ഊര്ജ്ജിതം. ആഗസ്തില് നടക്കുന്ന അയര്ലന്ഡ് പരമ്പരയോടെ താരത്തെ ടീമിലെടുക്കാനാണ് ആലോചന. പരിക്ക് കാരണം മാസങ്ങളായി വിട്ടുനില്ക്കുകയാണ് താരം.
ഇക്കഴിഞ്ഞ ഇന്ത്യന് പ്രീമിയര് ലീഗ് പൂര്ണമായും നഷ്ടപ്പെട്ട താരങ്ങളില് ഒരാളാണ് ബുംറ. ആഗസ്തില് തന്നെ താരത്തെ കളിപ്പിക്കാനുള്ള തീരുമാനം അണിയറയില് നടക്കുമ്പോള് തന്നെ വെസ്റ്റ് ഇന്ഡീസ് പര്യടനത്തിനുള്ള ട്വന്റി20 ടീമിനെ ഇനിയും പ്രഖ്യാപിച്ചിട്ടില്ലെന്നത് ശ്രദ്ധേയമാണ്. ആഗസ്ത് 18നാണ് അയര്ലന്ഡ് പര്യടനത്തിലെ ആദ്യ ട്വന്റി20 പോരാട്ടം. തുടര്ന്ന് 20,23 തീയതികളിലും മത്സരങ്ങളുണ്ടാകും. ഒക്ടോബര്-നവംബര് മാസങ്ങളിലായി നടക്കുന്ന ലോകകപ്പ് ക്രിക്കറ്റ് മുന്നില് കണ്ട് ഇന്ത്യ കരുതിവച്ചിരിക്കുന്ന താരമാണ് ബുംറ. ലോകകപ്പിന് മുന്നോടിയായി സപ്തംബറില് നടക്കുന്ന ഏഷ്യാകപ്പ് ക്രിക്കറ്റിലും താരത്തെ ഇറക്കിയേക്കാന് സാധ്യതയുണ്ട്. അതിന്റെ മുന്നൊരുക്കമെന്ന നിലയിലാണ് അയര്ലന്ഡ് പര്യടനത്തില് ട്വന്റി20 കളിപ്പിക്കാനൊരുങ്ങുന്നത്.
