ന്യൂദല്‍ഹി : സ്വാതന്ത്ര്യ സമര സേനാനി വീര്‍ സവര്‍ക്കറുടെ 140-ാം ജന്മവാര്‍ഷിക ദിനത്തില്‍ പഴയ പാര്‍ലമെന്റ് മന്ദിരത്തിലെ സെന്‍ട്രല്‍ ഹാളില്‍ വി ഡി സവര്‍ക്കറുടെ ഛായാചിത്രത്തില്‍ പുഷ്പാര്‍ച്ചന നടത്തി പ്രധാനമന്ത്രി നരേന്ദ്ര മോദി. ലോക്സഭാ സ്പീക്കര്‍ ഓം ബിര്‍ള, വിവിധ കേന്ദ്രമന്ത്രിമാര്‍, പാര്‍ലമെന്റ് അംഗങ്ങള്‍ എന്നിവരും പുഷ്പാര്‍ച്ചന നടത്തി.
തന്റെ ത്യാഗം, ധൈര്യം, നിശ്ചയദാര്‍ഢ്യം എന്നിവയിലൂടെ സവര്‍ക്കര്‍ ഇന്നും എല്ലാവരെയും പ്രചോദിപ്പിക്കുന്നുവെന്ന് മോദി അഭിപ്രായപ്പെട്ടു. സാമൂഹിക സമത്വത്തിനും സാമൂഹിക നീതിക്കും വേണ്ടി വീര്‍ സവര്‍ക്കറുടെ സംഭാവനകള്‍ എന്നും സ്മരിക്കപ്പെടുമെന്നും അദ്ദേഹം പറഞ്ഞു.
മഹാരാഷ്‌ട്രയില്‍ ഞായറാഴ്ച സംസ്ഥാനത്തുടനീളം വിവിധ പരിപാടികള്‍ സംഘടിപ്പിച്ചു. ‘വീര്‍ഭൂമി പരിക്രമ’യുടെ കീഴില്‍ മഹാരാഷ്‌ട്ര സംസ്ഥാന വിനോദസഞ്ചാര വകുപ്പ് സംസ്ഥാനത്തുടനീളം ‘സവര്‍ക്കര്‍ വിചാര് ജാഗരണ്‍ വീക്ക്’ സംഘടിപ്പിച്ചിട്ടുണ്ട്. സവര്‍ക്കര്‍ സദനില്‍ നിന്ന് ദാദറിലെ സ്വാതന്ത്ര്യവീര്‍ സവര്‍ക്കര്‍ സ്മാരകത്തിലേക്ക് ദേശീയ അനുസ്മരണ നടത്തയും വെളിച്ചം ഉത്സവവും സംഘടിപ്പിച്ചിട്ടുണ്ട്.
