തിരുവനന്തപുരം: പത്താം ക്ലാസിലെ പരീക്ഷാഫലം വരുന്നതിനു തൊട്ടുമുന്പു മരണത്തിനു കീഴടങ്ങിയ സാരംഗിന് പരീക്ഷയില് ഉന്നത വിജയം. ഗ്രേസ് മാര്ക്ക് ഇല്ലാതെ എല്ലാ വിഷയങ്ങള്ക്കും സാംരഗിന് എ പ്ലസ് നേടിയതായി വിദ്യാഭ്യാസമന്ത്രി വി. ശിവന്കുട്ടി അറിയിച്ചു. ഫലപ്രഖ്യാപനത്തിനു ശേഷം പ്രത്യേകമായാണ് സാംരഗിന്റെ വിജയം മന്ത്രി അറിയിച്ചിത്. ആറ്റിങ്ങല് ബോയ്സ് സ്കൂളിലെ പത്താം ക്ലാസ് വിദ്യാര്ഥി ബി.ആര്.സാരംഗ് (16) അപകടത്തില് പരുക്കേറ്റു ചികിത്സയിലിരിക്കെയാണു ബുധനാഴ്ച രാവിലെ മരണം സ്ഥിരീകരിച്ചത്.
സാരംഗിന്റെ കണ്ണുകള്, കരള്, ഹൃദയം, മജ്ജ തുടങ്ങിയ അവയവങ്ങള് ആറു പേര്ക്കായി ദാനം ചെയ്യാന് മാതാപിതാക്കള് സമ്മതം നല്കിയിരുന്നു. കോട്ടയം സ്വദേശിയായ കുട്ടിക്കുവേണ്ടി ഹൃദയം കഴിഞ്ഞ ദിവസം തന്നെ കൊണ്ടുപോയിരുന്നു. അവയവമാറ്റ നടപടികള് പൂര്ത്തിയായശേഷം ഉച്ചയ്ക്കു 12.30നു മൃതദേഹം ബന്ധുക്കള് ഏറ്റുവാങ്ങിയിരുന്നു. ഇന്നാണ് സാംരഗിന്റെ സംസ്കാരം. കരവാരം വഞ്ചിയൂര് നടക്കാപറമ്പ് നികുഞ്ജത്തില് ബനീഷ് കുമാറിന്റെയും രജനിയുടെയും മകനായ സാരംഗ് കഴിഞ്ഞ 6 നു വൈകിട്ട് 3 ന് അമ്മയോടൊപ്പം ഓട്ടോറിക്ഷയില് സഞ്ചരിക്കുമ്പോള് തോട്ടക്കാട് വടക്കോട്ടുകാവ് കുന്നത്തുകോണം പാലത്തിനു സമീപത്തായിരുന്നു അപകടം. കേരള ബ്ലാസ്റ്റേഴ്സ് ആറ്റിങ്ങല് മാമത്തു നടത്തുന്ന ഫുട്ബോള് പരിശീലനത്തില് പങ്കെടുക്കുകയായിരുന്ന സാരംഗിനു ഫുട്ബോള് താരമാകാനായിരുന്നു ആഗ്രഹം. ആശുപത്രിയില് കഴിയവേ, ഫുട്ബോള് കളിക്കാനുള്ള ബൂട്ട് വാങ്ങണമെന്ന ആഗ്രഹം സാരംഗ് പങ്കുവച്ചിരുന്നു. ഏക സഹോദരന്: യശ്വന്ത്.
