തിരുവനന്തപുരം: സജി ചെറിയാന്റെ ബഹ്റൈന് യാത്രയ്ക്കായി അപേക്ഷ സമര്പ്പിച്ചത് രണ്ടു ദിവസം മുമ്പ് മാത്രമാണെന്ന് കേന്ദ്ര വിദേശകാര്യ സഹമന്ത്രി വി. മുരളീധരന്. പത്താം തീയതിയിലെ യാത്രക്കായി അപേക്ഷ നല്കിയത് ഒന്പതാം തീയതി മാത്രമാണ്. ഇതിന്റെ ഭാഗമായി പതിനൊന്നാം തീയതി അനുവാദം നല്കുകയും ചെയ്തുവെന്നും അദേഹം വ്യക്തമാക്കി.
ഒരു യാത്രാനുമതിക്ക് മുമ്പ് ബഹ്റൈനിലെ ഇന്ത്യന് എംബസിയുടെയും വിദേശകാര്യവകുപ്പിലെ ബന്ധപ്പെട്ട ഡസ്കിന്റെയും പരിശോധന ആവശ്യമാണ്. ഇതിനായി കുറഞ്ഞത് ഒരു ദിവസമെങ്കിലും ആവശ്യമാണ്. ഇത് എല്ലവര്ക്കും അറിയാവുന്ന സാധാരണയായ നടപടിയാണ്. സാധാരണഗതിയില് യാത്രയ്ക്ക് 15 ദിവസം മുമ്പെങ്കിലും അപേക്ഷ നല്കേണ്ടതാണ്. അവസാന നിമിഷം മാത്രം അപേക്ഷ സമര്പ്പിച്ചത് എന്തുകൊണ്ടെന്ന് സജി ചെറിയാന് വ്യക്തമാക്കമെന്നും വി. മുരളീധരന് പറഞ്ഞു.
ഈ വിഷയത്തെ കുറിച്ച് മന്ത്രിയുടെ സ്റ്റാഫിനു അറിവില്ലെങ്കില് അതിന് കേന്ദ്രസര്ക്കാരിനെ പഴിച്ചിട്ട് കാര്യമില്ല. അതേസമയം അബുദബി നിക്ഷേപ ഫോറത്തില് കേരള മുഖ്യമന്ത്രിക്ക് റോളില്ലെന്ന് വിദേശകാര്യവകുപ്പിന് ബോധ്യപ്പെട്ടതിനാലാണ് അനുമതി നിഷേധിച്ചത്. പല മുഖ്യമന്ത്രിമാരും അപേക്ഷിച്ചെങ്കിലും അനുമതി നല്കിയില്ല. സംസ്ഥാനത്തിനും രാജ്യത്തിനും അപമാനമുണ്ടാകുന്ന തരത്തിലുള്ള പങ്കാളിത്തം ഉണ്ടാകരുത് എന്നതിനാലാണ് തീരുമാനമെന്നും കേന്ദ്രമന്ത്രി കൂട്ടിച്ചേര്ത്തു.
