ദേവാര ഹിപ്പര്ഗി: കോണ്ഗ്രസ് അധികാരത്തില് വന്നപ്പോള് 1700 പോപ്പുലര് ഫ്രണ്ട് അംഗങ്ങളെയാണ് ജയിലില് നിന്നും മോചിപ്പിച്ചതെന്നും മോദി സര്ക്കാര് പോപ്പുലര് ഫ്രണ്ടിനെ നിരോധിച്ചെന്നും അമിത് ഷാ. കോണ്ഗ്രസ് അധികാരത്തില് വന്നാല് എല്ലാ ദേശ വിരുദ്ധ ശക്തികളെയും കയറൂരി വിടും. ഇനി കര്ണ്ണാടകയില് കോണ്ഗ്രസ് അധികാരത്തില് തിരിച്ചുവന്നാലും പോപ്പുലര് ഫ്രണ്ടിന് മോദി ഭരണത്തിന് കീഴില് രക്ഷയില്ലെന്നും കര്ണ്ണാടക എന്നെന്നും സുരക്ഷിതമായിരിക്കുമെന്നും അമിത് ഷാ പറഞ്ഞു.
തെരഞ്ഞെടുപ്പ് റാലിയെ അഭിസംബോധന ചെയ്ത് ദേവാര ഹിപ്പര്ഗിയില് സംസാരിക്കുകയായിരുന്നു അമിത് ഷാ. ഒരു വശത്ത് മോദിയും ബസവരാജ് ബൊമ്മൈയും ചേര്ന്ന ഡബിള് എഞ്ചിന് സര്ക്കാരുണ്ടെന്നും മറുഭാഗത്ത് റിവേഴ്സ് ഗിയറില് പോകുന്ന കോണ്ഗ്രസ് സര്ക്കാരാണ് ഉള്ളത്. അവര് ഇനിയും അധികാരത്തില് വന്നാല് റിവേഴ്സ് ഗിയറില് പോയി കാര്യങ്ങള് പഴയ നിലയില് ആക്കും. – അമിത് ഷാ പറഞ്ഞു.
കര്ണ്ണാടകയില് മുസ്ലിങ്ങള്ക്കുണ്ടായിരുന്ന നാല് ശതമാനം സംവരണം എടുത്തുകളഞ്ഞത് മതത്തിന്റെ അടിസ്ഥാനത്തില് സംവരണം പാടില്ലെന്നുള്ളതുകൊണ്ടാണെന്നും അമിത് ഷാ പറഞ്ഞു. കോണ്ഗ്രസ് അധികാരത്തില് വന്നാല് കുടുംബ വാഴ്ച തിരിച്ചുവരുമെന്നും അതോടെ കര്ണ്ണാടക വീണ്ടും ലഹളകളുടെ സംസ്ഥാനമായി മാറുമെന്നും അമിത് ഷാ പറഞ്ഞു.
