ന്യൂദല്‍ഹി: അച്ഛനോടുള്ള സ്നേഹവും ബഹു മാനവും എന്നും നിലനില്‍ക്കുമെന്നും അച്ഛന്റെ അനുഗ്രഹം തനിക്ക് ഉണ്ടാകുമെന്നും അനില്‍ ആന്റണി. ദല്‍ഹിയില്‍ മാധ്യമപ്രവര്‍ത്തകരോട് പ്രതികരിക്കുകയായിരുന്നു അദ്ദേഹം. വീട്ടില്‍ നാലുപേരുണ്ട്. അച്ഛനും അമ്മയും സഹോദരനും ഞാനും. ഓരോരുത്തരും വ്യത്യസ്തമായ വ്യക്തിത്വമുള്ളവരാണ്. താന്‍ ഏറ്റവും കൂടുതല്‍ സ്നേഹിക്കുകയും ബഹുമാനിക്കുകയും ചെയ്യുന്നത് അച്ഛനെയാണ്.
ഇപ്പോള്‍ സംഭവിക്കുന്നത് വ്യക്തിത്വങ്ങളുമായി ബന്ധപ്പെട്ട കാര്യമല്ല. മറിച്ച് ആശയങ്ങളെ സംബന്ധിച്ച അഭിപ്രായ ഭിന്നതയാണ്. ബിജെപിയില്‍ ചേര്‍ന്നത് ശരിയായ ചുവടുവെപ്പാണെന്ന് താന്‍ ഉറച്ചുവിശ്വസിക്കുന്നു. അച്ഛനോടുള്ള സ്നേഹവും ബഹുമാനവും അതേപടി നിലനില്‍ക്കും. എക്കാലവും നിലനില്‍ക്കുകയും ചെയ്യും.
രാഷ്ട്രീയം കുടുംബത്തിനുള്ളില്‍ ഒരിക്കലും ഭിന്നതയുണ്ടാക്കില്ല. അച്ഛന്‍ പാര്‍ലമെന്ററി രാഷ്ട്രീയം അവസാനിപ്പിച്ച് വിശ്രമത്തിലാണ്. തന്റെ ബിജെപി പ്രവേശനം സംബന്ധിച്ച ചര്‍ച്ചകളിലേക്ക് അദ്ദേഹത്തിന്റെ പേര് കൊണ്ടുവരുന്നത് മാധ്യമപ്രവര്‍ത്തകര്‍ അവസാനി പ്പിക്കണമെന്നും അനില്‍ ആന്റണി കൂട്ടിച്ചേര്‍ത്തു.
