മുംബൈ: ബ്രിട്ടീഷ് അധികാരികളോട് സവര്ക്കര് മാപ്പ് പറഞ്ഞതിന് തെളിവ് ഹാജരാക്കാന് രാഹുല് ഗാന്ധിയെ വെല്ലുവിളിച്ച് സവര്ക്കറുടെ കൊച്ചുമകന് രഞ്ജിത് സവര്ക്കര്. ഈ വിഷയത്തില് രാഹുല് ഗാന്ധി മാപ്പ് പറയണം. ഇല്ലെങ്കില് പൊലീസില് കേസ് കൊടുക്കുമെന്നും രഞ്ജിത് സവര്ക്കര് വാര്ത്ത ഏജന്സിയായ പിടിഐയ്ക്ക് നല്കിയ അഭിമുഖത്തില് ആവശ്യപ്പെട്ടു.
കഴിഞ്ഞ ദിവസം രാഹുല് ഗാന്ധിയുടെ എംപി സ്ഥാനം എടുത്തുകളഞ്ഞ കോടതി ഉത്തരവിനെ തുടര്ന്ന് മാപ്പ് പറയാന് താന് സവര്ക്കറല്ല, ഗാന്ധിയാണെന്ന് രാഹുല് ഗാന്ധി നടത്തിയ പരാമര്ശത്തെച്ചൊല്ലി മഹാരാഷ്ട്രയില് വിവാദം പുകയുകയാണ്. ഈ പരാമര്ശത്തിന്റെ പേരില് അവിടെ കോണ്ഗ്രസും ശിവസേനയും എന്സിപിയും പ്രതിക്കൂട്ടില് നില്ക്കുകയാണ്.
സവര്ക്കാര് അല്ലാത്തതിനാല് താന് മാപ്പ് പറയില്ലെന്ന് രാഹുല് ഗാന്ധി പറയുന്നു. എന്നാല് സവര്ക്കര് മാപ്പ് പറഞ്ഞതായി തെളിയിക്കുന്ന രേഖകള് കാണിക്കാന് രാഹുല് ഗാന്ധിയെ വെല്ലുവിളിക്കുന്നു. രണ്ട് തവണ രാഹുല് ഗാന്ധി സുപ്രീംകോടതിയില് മാപ്പ് പറഞ്ഞയാളാണ്. രാഹുല് ഗാന്ധി ചെയ്യുന്നതെല്ലാം ബാലിശമായ കാര്യങ്ങളാണ്. – രഞ്ജിത് സവര്ക്കര് പറഞ്ഞു.
