ന്യൂദല്ഹി : മദ്യ നയക്കേസില് ദല്ഹി മുന് ഉപമുഖ്യമന്ത്രി മനീഷ് സിസോദിയയ്ക്ക് പിന്നാലെ ഒരു മലയാളി കൂടി അറസ്റ്റില്. അരുണ് രാമചന്ദ്രന് പിള്ളയാണ് എന്ഫോഴ്സ്മെന്റ് ഡയറക്ടറേറ്റിന്റെ പിടിയിലായത്. സിബിഐയുടെ കേസിലെ പതിനാലാം പ്രതിയാണ് അരുണ്.
തെലങ്കാന മുഖ്യമന്ത്രിയുടെ മകള് കവിതയുമായി അടുപ്പമുള്ള വ്യക്തിയാണ് വ്യവസായിയായ അരുണ്. നേരത്തെ കേസിലെ മുഖ്യ സൂത്രധാരനായ മലയാളി വിജയ് നായരും അറസ്റ്റിലായിരുന്നു. കേസില് കേന്ദ്ര ഏജന്സി പിടിമുറുക്കിയിരിക്കുകയാണ്.
അതേസമയം മദ്യനയ കേസില് അറസ്റ്റിലായ മനീഷ് സിസോദിയയെ മാര്ച്ച് 20 വരെ ജുഡീഷ്യല് കസ്റ്റഡിയില് വിട്ടു. ദല്ഹി റോസ് അവന്യൂ കോടതിയില് ഹാജരാക്കിയ സിസോദിയയെ കൂടുതല് ദിവസം കസ്റ്റഡിയില് വേണമെന്ന് സിബിഐ ആവശ്യപ്പെടുകയായിരുന്നു.
